ပရမတ္ထပိုင်းက ကြည့်မယ်ဆိုလို့ရှိရင် ခုန သမ္မုတိသစ္စာတွေဟာ အမှားဖြစ်သွားတယ်၊ အမေဆိုတာ ဘယ်မှာလဲ၊ အဖေဆိုတာ ဘယ်မှာလဲ၊ ယောက်ျားဆိုတာ ဘယ်မှာလဲ၊ အမျိုးသမီး ဆိုတာ ဘယ်မှာလဲ၊ ဘယ်ဟာကို အ၀တ်ခေါ်တာလဲလို့ ပရမတ္ထရှုထောင့်ကနေ ကြည့်လိုက်လို့ရှိရင် သမ္မုတိသစ္စာက ပြောတာတွေက အမှားတွေချည်းပဲ၊ အကန်ုလုံး၊ မမှန်တော့ဘူး၊ ဉာဏ်နဲ့ ခွဲကြည့်လိုက်ရင် အကုန် ပျောက်သွားပြီ၊ ဟုတ်ရဲ့လား၊ အသိဉာဏ်နဲ့ ရှာကြည့်လိုက်တာနဲ့ လုံးဝ မရှိတော့ဘူး။
များပြောနေတဲ့ လူဆိုတာ ဘယ်ဟာကို ပြောတာတုန်းဆိုတော့ လူလို့ ပြောစရာ ဘာမှ မရှိတော့ဘူး၊ ပျောက်သွားရော၊ အဲဒီတော့ အကုန်လုံး အမှားတွေ ဖြစ်နေတယ်၊ ဘာဖြစ်လို့တုန်း ဆိုလို့ရှိရင် ရုပ်နဲ့နာမ် ဒီနှစ်မျိုးပဲ ရှိတာကိုး၊ ရုပ်နာမ်ကလွဲလို့ လူလို့ခေါ်စရာ တစ်ခုမှ မရှိဘူးနော်၊ သူခေါ်ထားတဲ့အတိုင်း တစ်ခုမှ မဟုတ်ဘူး၊ ဒါကြောင်မို့ ပရမတ္ထသစ္စာ ရှုထောင့်က ကြည့်လိုက်ရင် သမ္မုတိသစ္စာဟာ အလွဲအမှား ဖြစ်သွားပြန်တယ်။
အဲဒီတော့ မေးစရာ ကြောင်းရှိတယ်၊ ဘာဖြစ်လို့ ပရမတ္ထသစ္စာကို သိအောင် လုပ်ရတာလဲ၊ သမ္မုတိသစ္စာ ရှုထောင့်ကသာ ကြည့်နေမယ်ဆိုလို့ရှိရင် တွယ်တာမှုကို ဘယ်တော့မှ မဖယ်ရှားနိုင်ဘူး၊ အတွယ် အတာဆိုတဲ့ တဏှာလောဘကို မဖယ်ရှားနိုင်သမျှ ကာလပတ်လုံး ထိုပုဂ္ဂိုလ်တွေ သံသရာဝဋ်က မလွတ်နိုင်ဘူးတဲ့။
အမေဆိုတဲ့ အမြင်နဲ့ တွယ်တာမယ်၊ အဖေဆိုတဲ့အမြင်နဲ့ တွယ်တာမယ်၊ ဒါက အမျိုးသားပဲ၊ အမျိုးသမီးပဲဆိုတာနဲ့ တွယ်တာမယ်၊ တွယ်တာစရာအာရုံတွေကို အစစ်အမှန် ထင်ပြီးတော့ တွယ်တာနေလိမ့်မယ်၊ မျက်စိလည် လှမ်းမှားနေကြတာ၊ သညာ က မှတ်ထားတဲ့ အတိုင်း တွယ်တာနေဦးမှာပဲ၊
ဒါကြောင့် ပရမတ္ထသစ္စာဆိုတဲ့ ရှုထောင့်က မကြည့်နိ်ုင်သမျှ ကာလပတ်လုံး သမ္မုတိသစ္စာကို မကျော်လွှားနိုင်သမျှ ကာလပတ်လုံး တွယ်တာမှု လိုချင်မှုဆိုတဲ့ တဏှာ,လောဘကို မပယ်နိုင်ဘူးတဲ့၊ မပယ်နိုင်လို့ရှိရင် မုန်းတီးမှုတို့ ရွံရှာမှုတို့ဆိုတဲ့ ဒေါသတွေလည်း လာမှာပဲ၊ တွယ်တာမှုကို အကြောင်းပြုပြီး ဒေါသဖြစ်မှုဆိုတာ ပေါ်လာတာပဲ၊ အဲဒီတော့ လောကလူတွေဟာ အားလုံး အမြင်မှားပြီးတော့ ဒုက္ခတွေ ရောက်နေကြတာဟာ ပရမတ္ထသစ္စာရှုထောင့်က မကြည့်နိုင်လို့ပဲနော်။
သဘာဝသစ္စာ နဲ့ အရိယသစ္စာ
ပရမတ္ထကို တစ်ခါထပ်ပြီးတော့ လယ်တီဆရာတော်ဘုရားကြီးက ခွဲပြသေးတယ်၊ ပရမတ္ထသစ္စာကိုပဲ သဘာဝသစ္စာနဲ့ အရိယသစ္စာဆိုပြီး ခွဲလိုက်တယ်၊ သဘာဝသစ္စာဆိုတာအကြောင်းတစ်ခုကို အခြေပြုပြီးတော့ မှန်တယ်လို့ ပြောရတာ၊ လုံးဝ အမှန်မဟုတ်သေးဘူး၊ အရိယသစ္စာကျတော့မှ လုံးဝ အမှန်ပဲ၊ ဒီလို လယ်တီဆရာတော်ဘုရားကြီးက ခွဲတယ်။
ဒါဖြင့် သဘာဝသစ္စာဆိုတာက သဘာဝတရားတွေရဲ့ အရှိ၊ သဘာဝတရားတွေမှာ ရှိနေတဲ့ နေအထားကို ကြည့်ပြီး သဘာဝသစ္စာလို့ ဆိုတာ၊ ဆိုပါစို့၊ ဖဿဆိုတာ ထိတွေ့တဲ့ သဘောရှိတယ်၊ ဝေဒနာဆိုတာ ခံစားတဲ့သဘောရှိတယ်၊ သညာဆိုတာ မှတ်တဲ့သဘော ရှိတယ်၊ သဘာဝအားဖြင့် ဒီလိုရှိတယ်၊ သဘာဝသစ္စာ မှန်နေတယ်၊ သူ့သဘောကို ကြည့်မယ် ဆိုရင် မှန်တယ်၊ ပြောတဲ့အတိုင်း ဟုတ်တယ်၊ အဲဒီသသဘာဝသစ္စာတောင်မှပဲ အရိယသစ္စာ ရှုထောင့်ကကြည့်ရင် မှားသွားနေတယ်တဲ့။
သဘာဝသစ္စာအနေနဲ့ မြတ်စွာဘုရားက ဝေဒနာကို ခွဲပြီးတော့ ဟောတယ်၊ ဒါက သုခဝေဒနာ- ချမ်းသာမှုကို ခံစားတယ်၊ ဒါက ဒုက္ခဝေဒနာ- ဆင်းရဲမှုကို ခံစားတယ်၊ ဒါက ဒုက္ခမသုခဝေဒနာ- ဆင်းရဲတာလည်း မဟုတ်ဘူး၊ ချမ်းသာတာလည်း မဟုတ်ဘူး၊ စပ်ကြားမှာ ခံစားမှုဆိုပြီး ဝေဒနာ ၃-မျိုး ခွဲလိုက်သေးတယ်၊ သဘာဝရှုထောင့်က ကြည့်လိုက်လို့ ရှိရင် ချမ်းသာတယ်၊ ဟုတ်သလိုလို ရှိတယ်၊ ဆင်းရဲတယ်၊ ဟုတ်သလိုလိုရှိမယ်၊ ဒါ သဘာဝသစ္စာရှု ထောင့်ကနေ ကြည့်ရင် ချမ်းသာတယ်လို့လည်း ပြောလို့ရတယ်၊ ဆင်းရဲတယ်လို့လည်း ပြောလို့ရတယ်၊ ချမ်းသာ-ဆင်းရဲ နှစ်ခုစပ်ကြားက ခံစားချက်လို့လည်း ပြောလို့ရတယ်။
*ဆက်ရန်* -------
{အရိယသစ္စာ၊ ပရမတ္ထသစ္စာကို ဟောရခြင်းအကြောင်း} အား ဆက်လက်ရေးသား ပူဇော်ပါမည်။
မှတ်ချက်။ ။ ဒေါက်တာနန္ဒမာလာဘိဝံသ၏ အဘိဓမ္မာ မြတ်ဒေသနာမှ ပူဇော်သည်။
No comments:
Post a Comment