ဘ၀င်စိတ်ကလေးကိုပဲ ‘မနောဒွါရ’ mine door လို့ခေါ်သေးတယ်။ ဒီအခြေခံစိတ်(ဘ၀င်စိတ်)မရှိဘဲနဲ့ လှုပ်ရှားတဲ့စိတ်(၀ီထိစိတ်) တွေ မပေါ်နိုင်ဘူး၊ ဒီစိတ်ကလေးကလည်း မြဲတာ မဟုတ်ဘူး၊ သူ့အာရုံနဲ့ သူသွားတာ၊ ဒီ အကျိုးစိတ်(၀ိပါတ်စိတ်)ကို အခြေခံစိတ် သို့မဟတ် ဘ၀င်စိတ်၊ အဲဒါကိုပဲ အဘိဓမ္မတ္ထ သင်္ဂဟမှာ ၀ီထိမုတ်စိတ် though free; process free လို့ ခေါ်တယ်၊ မျက်မှောက်ဘ၀ အာရုံတွေနဲ့ လက်တွေ့ဘ၀ အာရုံတွေ ဖြစ်နေတဲ့ ဖြစ်စဉ်ထဲမှ မပါဘူး၊ လွတ်နေတဲ့စိတ်၊ ၀ီထိမုတ်စိတ် အဲဒီစိတ်ကလေးဟာ ဖြစ်နေတယ်လုိ့ ပြောတာ၊ သူ့အကြောင်းလေးနဲ့သူ ဖြစ်ပြီးတော သွားမှာပဲ။
ပဋိသန္ဓေအခါနဲ့ ပ၀တ္တိအခါ ၀ီထိစိတ်နောက်တစ်ခုက ကံတရားကြောင့် အကျိုးပေါ်တဲ့ စိတ်ကလေးတွေ ရှိသေးတယ်၊ ကံတရားက စိတ်ကို ထုတ်လုပ်တဲ့အခါ နှစ်နေရာမှ ထုတ်လုပ်တယ်၊ ပဋိသန္ဓေမှာ တစ်ခါ, ပ၀တ္တိမှာတစ်ခါ ထုတ်လုပ်တာ်၊ ပဋိသန္ဓေအခါမှာ ထုတ်ရင် တစ်ခုပဲ ထုတ်တယ်၊ ပ၀တ္တိအခါကျတော့ တစ်ခုထက်ပိုပြီး ထုတ်တယ်၊ ပ၀တ္တိဆိုတာ ပဋိသန္ဓေစိတ်ပေါ်ပြီးနောက် စုတိစိတ်မပေါ်ခင် အချိန်ကာလကို ‘ပ၀တ္တိ’ ဟု ခေါ်တယ်၊ သူ့ကျတော့ ပြင်ပအကူအညီတွေနဲ့ ကံတရားက ထုတ်လုပ်တယ်၊ ဒီ စိတ်တွေဖြစ်လာဖို့က မျက်မှောက် ဘ၀ အာရုံအသစ်တွေရဲ့ အကူအညီကြောင့် ဖြစ်တယ်။
ဝိညာဏစိတ် ၁၀-မျိုး
စက္ခုဝိညာဏ်စိတ်-မြင်သိစိတ်၊ သောတ၀ိညာဏ်စိတ်-ကြားသိစိတ်၊ ဃန၀ိညာဏ်စိတ်-နံသိစိတ်၊ ဇိဝှာဝိညာဏ်စိတ်-လျက်သိစိတ်၊ ကာယ၀ိညာဏ်စိတ်-ထိသိစိတ်ဆိုတာတွေထဲမှာ ကုသိုလ်ရဲ့ အကျိုးကတစ်ခု၊ အကုသိုလ်ရဲ့အကျိုးက တစ်ခု၊ စက္ခုဝိညာဏ်စိတ်(၂)ခုလို့ ပြောတာ၊ တချို့က မျက်စိနှစ်လုံးရှိလို့ စက္ခုဝိညာဏ်ဒွေးလို့ ပြောတယ်၊ မဟတ်ဘူး၊ နားကလည်း နှစ်ခုရှိလို့၊ နှာခေါင်းကလည်း နှစ်ပေါက်ရှိလုိ့၊ လျှာကလည်း နှစ်ခွရှိလို့၊ အဲဒါ မြွေမှ မဟုတ်တာ၊ ကာယကလည်း အဲဒါ မနုဿီဟမှ ရှိတာ၊ အဲဒီတော့ အဲဒါကို ပြောတာမဟုတ်ဘူး၊ ကုသိုလ်ရဲ့အကျိုး အကုသိုလရဲ့ အကျိုးဆိုပြီး အကျိုးနှစ်မျိုးကို ကြည့်ပြီး နှစ်ခုစီ၊ နှစ်ခုစီလို့ ပြောတာ။
ကံက အကျိုးတရားကို ပ၀တ္တိအခါ ထုတ်နိုင်တာ၊ မျက်စိမြင်သိစိတ်(၂)မျိုး နားက ကြားသိစိတ်၊ နှာခေါင်းက နံသိစိတ်၊ လျှာက ရသာသိစိတ်၊ ကိုယ်က ထိသိစိတ်၊ အကုသိုလ်ကံက တစ်ခု ထုတ်တယ်၊ ကုသိုလ်ကံက တစ်ခုထုတ်တယ်၊ အားလုံး ၀ိပါက်စိတ်(၁၀)ခု ဖြစ်သွားတယ်။
သမ္ပဋိစ္ဆိုန်းစိတ်
နောက်တစ်ခု၊ ဘာတွေ ထုတ်သေးတုန်းဆိုရင် သမ္ပဋိစ္ဆိုန်းစိတ် reception နှစ်ခုကိုလည်း ထုတ်သေးတယ်၊ ဒါလည်း ကုသိုလ်ရဲ့ အကျိုး အကုသိုလ်ရဲ့ အကျိုးဆိုပြီး နှစ်ခုဖြစ်တာ။ မြင်သိပြီးအတဲ့အခါ အာရုံကို လက်ခံတဲ့စိတ်၊ ကြားသိပြီးအတဲ့အခါ အာရုံကို လက်ခံတဲ့စိတ်၊ နံသိ၊ လျက်သိ၊ ထိသိပြီးတဲ့အခါ အာရုံကို လက်ခံတဲ့စိတ် reception ပေါ့၊ ဟိုတယ်သွားရင် လက်ခံတဲ့နေရာရှိတယ်၊ အလှူခံဌာနမှာ လက်ခံတဲ့ နေရာရှိတယ်၊ စိတ်ထဲမှာလည်း လက်ခံတဲ့နေရာ ရှိတယ်၊ သမ္ပဋိစ္ဆန ဆိုတာ လက်ခံတာ အာရုံဝင်လာရင် လက်ခံတဲ့နေရာ ရှိရမှာပေါ့၊ မြင်သိစိတ်ဖြစ်ပြီးရင် ထိုစိတ်နောက်က သူက ဖြစ်ကို ဖြစ်ရတယ်၊ ကြားသိစိတ်၊ နံသိစိတ်၊ စားသိစိတ်၊ ထိသိစိတ် ဖြစ်ပြီးရင် ထိုစိတ်နောက်က သူ ဖြစ်ကို ဖြစ်ရတယ်၊ သူကလည်း ကံက ထုတ်ထားတဲ့စိတ်။
သန္တီရဏစိတ် လက်ခံပြီးရင် စုံးစမ်းတဲ့ စိတ်ကလေး သန္တီရဏစိတ်က လာရတယ်၊ ဘာပဲဖြစ်ဖြစ် ကိုယ်လက်ခံပြီးရင် ပိုက်ဆံတောင်မှ လက်ခံပြီးရင် ရေတွက်ရတယ် မဟုတ်လား၊ အာရုံတစ်ခု ရလာပြီးရင် လက်ခံပြီး စုံစမ်းရတယ်၊ သဘာဝကလည်း အာရုံကို လက်ခံပြီးတဲ့နောက် စုံစမ်းဖို့ ဆက်ပေါ်ရသေးတယ်၊ ဒီစိတ်ဟာလည်း ကံရဲ့ အကျိုးစိတ်ပဲ။
အကုသိုလ်အကျိုးနဲ့ ကုသိုလ်အကျိုးခြုံပြောရင် အကုသိုလ်အကျိုးက (၇)ခုရှိတယ်၊ မြင်သိစိတ်၊ ကြားသိစိတ်၊ နံသိစိတ်၊ လျက်သိစိတ်၊ ထိသိစိတ်၊ လက်ခံတဲ့စိတ်၊ စုံစမ်းတဲ့စိတ်၊ အကုသိုလ်က ထုတ်လွှတ်လိုက်တာကျတော့ (၈)ခု ရှိတယ်၊ မြင်သိစိတ်၊ ကြားသိစိတ်၊ နံသိစိတ်၊ လျက်သိစိတ်၊ ထိသိစိတ်၊ လက်ခံတဲ့စိတ်ကတစ်ခု၊ စုံစမ်းတဲ့စိတ်က (၂)ခု ဖြစ်သွားတယ်၊ ဘာဖြစ်လို့ နှစ်ခုဖြစ်သလဲဆိုတော့ စုံစမ်းတဲ့အခါ ၀မ်းသာတဲ့ စုံစမ်းစိတ်နဲ့ ၀မ်းသာမှု လျော့နည်းတဲ့ ဥပေက္ခာနှင့်ယှဉ်တဲ့ စုံစမ်းစိတ်ကြောင့် နှစ်ခုဖြစ်သွားတယ်၊ အဲဒါမှာ မဟာဝိပါက်စိတ် ထပ်ထည့်ရင် ကုသိုလ်ရဲ့ အကျိုးက (၁၆)ခု ဖြစ်သွားတယ်။
အကုသိုလ်ကံက ထုတ်လုပ်တာ(၇)ခု၊ ကုသိုလ်ကံက ထုတ်လုပ်တာ (၁၆)ခု၊ ပေါင်းတော့ (၂၃)ခု၊ အဲဒါကို ကမ၀ိပါတ်(၂၃)ခုလို့ ပြောတာ၊ ကာမာဝစရကုသိုလ်ကံက ထုတ်လုပ်တာ သက်သက်ဖြစ်တယ်၊ ဒီထဲမှာ ဈာန်တွေ ဘာတွေနဲ့ မဆိုင်ဘူးနော်၊ ဈာန်တွေက ကျင့်မှ ရတဲ့စိတ်တွေ၊ ဒီထဲမှာ မပါဘူး၊ ဘုန်းကြီးတို့ဘ၀မှာ ဖြစ်နိုင်တာ (၂၃)ခုပဲ ဖြစ်နိုင်တယ်၊ မျက်စိတို့ နားတို့ မွေးရာပါ ပါသလိုပဲ ဟောဒီ စိတ်ကလည်း မွေးရာပါ ဖြစ်တဲ့စိတ်(၂၃)ခု ရှိတယ်၊ ဘ၀င်စိတ်က ပေါက်ဖွားနိုင်တဲ့ စိတ်တွေ ရှိသေးတယ်။
သို့သော်မျက်စိက ပစ္စုပ္ပန်အကြောင်းမပါဘဲ ပေါ်တာ၊ သူ့ချည်းသက်သက် စိတ်ကို ပေါ်အောင် လုပ်နိုင်တာ မဟုတ်ဘူး၊ စောင်းသံမြည်အောင် စောင်းကြိုးနဲ့ စောင်းအိုး ညှိထားရမယ်၊ စောင်းအိုးနဲ့ စောင်းကြိုး ညှိထားရင် လက်ကလေးနဲ့ တီးလိုက်တာနဲ့ အသံ သာသာယာယာ ထွက်လာမှာပဲ၊ အဲဒါလိုပဲ၊ ရူပါရုံနဲ့ စက္ခုပသာဒ၊ ဆုံလိုက်တာနဲ့ တစ်ပြိုင်နက် မြင်သိစိတ်စသည် ပေါ်တယ်၊ ပေါင်းဆုံမိတဲ့ အကြောင်းကြောင့် ပေါ်တယ်၊ အသံနဲ့နား ဆုံရင်တော့ သေတာဝိညာဏ်စိတ်၊ နောက်က လက်ခံစိတ်၊ စုံစမ်းစိတ်ပေါ်တယ်၊ ဆိုင်ရာ ဆိုင်ရာ အကြောင်းတွေကြောင့် အဲဒီလို ဆက်လာတာ၊ ဒါကို ‘စိတ္တနိယာမ’ လို့ခေါ်တယ်။
နိယာမဆိုတာ ဖ်ြစဉ်ကြီးတစ်ခုလို့ ပြောတာ၊ the law of nature ဘာဖြစ်လို့ နွေပြီးတဲ့အခါ မိုးရောက်၊ မိုးပြီးတဲ့အခါ ဆောင်း ရောက်ရတာလဲ၊ ဖြစ်စဉ်ကြီးပဲ မဟုတ်လား၊ ဘာဖြစ်လို့ မိုးရာသီကတော့ သစ်ပင်တွေ လန်းဆန်းပြီးတော့ အရွက်တွေ ဘာတွေ ဖားပြီ အပင်ကြီးက ထွားလာတာတုံး၊ ဆောင်းကျတော့ ဘာလို့ အပင်ကြီးက ခြောက်သွားတာတုံး၊ ဒါ ဥတုနိယာမပဲ၊ ဒီအတိုင်းပဲ၊ ဒီဟာလည်း the law of mind စိတ္တနိယာမပဲ၊ ဒီစိတ်ဖြစ်ရင် ဒီအတိုင်းဖြစ်ကို ဖြစ်ရမယ်။
ဘုန်းကြီးတို့ သန္တာန်မှာ ၀ိပါက်စိတ်(၂၃)ခု ဖြစ်လာရင် ပစ္စုပ္ပန် အကြောင်းတွေကို ငဲ့ပြီးတော့ ဖြစ်ကြရတယ်၊ ခုနပြောတဲ့ သန္ဓေစိတ်ကလေးကတော့ ပစ္စုပ္ပန် အကြောင်းနဲ့ ဘာမှ မဆိုင်ဘူး၊ ပဋိသန္ဓေအခါမှာ ဖြစ်တဲ့ဟာက သူ့ဘာသာသူ ကံအစွမ်းနဲ့ ဖြစ်နေမှာပဲ၊ ဒီသန္ဓေစိတ်ကလေးနဲ့ အခုဝိပါက်စိတ်မျိုးကို “အခြေခံစိတ်နဲ့ ဖြစ်ပေါ်စိတ်” လို့ ခွဲနိုင်တယ်။
အာဝဇ္ဇန်းစိတ် ၂-ခုနောက်တစ်ခုက ကုသိုလ်ကံကပေးတာလည်း မဟုတ်ဘူ၊ အကုသိုလ်ကံက ပေးတာလည်း မဟုတ်ဘူး၊ ကံရဲ့အကျိုး မဟုတ်ဘဲ ပေါ်လာတဲ့စိတ်နှစ်ခု ရှိသေးတယ်၊ ဘာကြောင့် ဒီစိတ်နှစ်ခု ပေါ်လာလဲဆိုရင် ၀တ္ထုနဲ့အာရုံ တိုက်လိုက်တဲ့ စွမ်းအားကြောင့် ပေါ်လာတယ်၊ ၀တ္ထုနဲ့အာရုံဆိုတာ မျက်စိနဲ့ အဆင်းအာရုံတိုက်တာ နားနဲ့ သဒ္ဒါရုံ၊ နှာခေါင်းနဲ့ ဂန္ဓာရုံ၊ လျှာနဲ့ရသာရုံ၊ ကိုယ်နဲ့ ဖောဋ္ဌဗ္ဗာရုံ တိုက်တာ၊ အဲဒီလိုတိုက်ပြီး ပေါ်လာတဲ့စိတ်ကို အာဝဇ္ဇန်းလို့ ခေါ်တယ်၊ သူက ဘ၀င်စိတ်တွေကို ရပ်အောင် လုပ်ပြီး အာရုံအသစ်သို့ ဦးလှည့်အောင် လုပ်တာ၊ ဒါကြောင့်မို့ စာပေကျန်းဂန်ထဲမှာ “ဘ၀င်္ဂံ အာဝေဋေတိ” ဘ၀င်စိတ် တွေကို အလှည့်အပြောင်း ဖြစ်အောင်လုပ်တက်လို့ဆိုတာ။
ခုန ပင်ကိုယ်အခြေခံ ဘ၀င်စိတ်က ကံအစွမ်းနဲ့ ကံ,ကမ္မနိမိတ်, ဂတိနိမိတ် အာရုံတစ်ခုခုကို အာရုံပြုပြီး သူ့အရှိန်နဲ့သူ သွားနေတာ။ ဒီ အာဝဇ္ဇန်းစိတ် ပေါ်လိုက်တာနဲ့ ဘ၀င်စိတ်ဟာ ပြတ်တောက်သွားတယ်၊ စိတ်ဆိုတာ နှစ်ခုပြိုင် မဖြစ်ဘူး၊ တစ်ခုချင်သာ ဖြစ်တယ်၊ ဘ၀င်စိတ်အစဉ်ကို အာဝဇ္ဇန်းက ဖြတ်တောက်လိုက်တာ၊ အာရုံအသစ် ပေါ်လိုက်တာနဲ့ တပြိုင်နက် အဲဒီ အာရုံအသစ်က စက္ခုပသာဒရုပ်တွေကို လာတိုက်ခိုက် လိုက်တာ၊ ပိတ်ထားတဲ့ တံခါးကို လာပြီးခေါက်တာနဲ့ တူတယ်။
အိမ်ထဲမှာ တံခါးပိတ်နေတုန်း အပြင်ကတံခါးကို (ဒေါက်ဒေါက်)နဲ့ ခေါက်လိုက်ရင် အတွေးတွေ ပြတ်မကုန်ဘူးလား၊ အိမ်ထဲမှာ နေနေတုန်း တံခါးကို လာခေါက်ရင် အတွေးတွေ ရပ်သွားတာ၊ တံခါးသွားဖွင့်ရတယ်၊ တံခါးသွားဖွင့်တာ အာဝဇ္ဇန်းနဲ့ တူတယ်၊ ဖွင့်ပေးလိုက်တဲ့အခါကျတော့ တံခါးခေါက်သူကို မြင်တာက စက္ခုဝိညဏ်စိတ် ဖြစ်တာနဲ့တူတယ်၊ လာပါ လာပါလို့ ခေါ်လိုက်တာက သမ္ပဋိစ္ဆိုင်းက လက်ခံလိုက်တာနဲ့ တူတယ်၊ ဘာကိစ္စ လာတုန်းလို့မေးတာက သန္တီရဏ နဲ့တူတယ်၊ သူပြောတဲ့အတိုင်း သဘောပေါက်သွားပြီး ကိစ္စရှိလို့ လာတာလို့ သိလိုက်တာ၊ ဆုံးဖြတ်ချက်ချလိုက်တာက ၀ုဋ္ဌော၊ ကော်ဖီလေး ဘာလေး အတူသောက်တာ ဇော၊ ပြီးတော့ နှုတ်ဆက်ပြီး ပြန်သွားတာ တဒါရုံပေါ့၊ ပြန်သွားပြီးနောက် တံခါးပိတ်လိုက်တာက ဘ၀င်ပြန်ကျသွားတယ်၊ ဒါဖြစ်စဉ်ပဲ၊ ဒါ့ပြင် ကိစ္စတွေလည်း ဒီအတိုင်း သွားနေတာ။
အဘိဓမ္မာဆိုတာ လူတွရဲ့ အကြောင်းကို ရှင်းပြနေတာ၊ ဒီလို ရှင်းရှင်းလင်းလင်း နားလည်ရမှာ၊ ဘုရား တရားတော်တွေက တကယ့်လက်တွေ့ အရှိကို ဟောနေတာနော်၊ စကားလုံးတွေက ကိုယ်နဲ့မရင်းနှီးလို့ တခြားအကြောင်းတွေ ပြောနေတယ် ထင်တာ၊ ဒီလို မဟုတ်ဘူးနော်၊ ဒီလို ဖြစ်စဉ်တွေထဲက နေ့စဉ် တွေ့နေတာ တွေကို ပြောနေတာ။
***** ဆက်ရန်
*ကောက်နှုတ်ချက်* အဂ္ဂမဟာပဏ္ဍိတ အရှင်နန္ဒမာလာဘိဝံသ (Ph.D)
အဘိဓမ္မာ မြတ်ဒေသနာ (ပထမတွဲ) (စာ ၂၀၂-၂၀၈) မှ ကောက်နှုတ်ရေးသား ပူဇော်ပါသည်။
No comments:
Post a Comment