တရားမဟောတော့ဟု စိတ်ညွတ်တော်မူပုံ
ဗုဒ္ဓဖြစ်တော်မူပြီးနောက် သတ္တ၀ါတို့အား တရားမဟောတော့ဟု စိတ်ဖြစ်တော်မူရာ၌ တချို့က မကျေမနပ် ဖြစ်ကြ၏၊ “သတ္တ၀ါတို့အား တရားမှန်ကို ပြမည်ဟု ဗုဒ္ဓဖြစ်အောင် ကြိုးစားတော်မူခဲ့ပါလျက် ယခုမှ တရားမဟောတော့ဟု စိတ်ညွတ် တော်မူခြင်းသည် နဂိုရည်ရွယ်ချက်နှင့် မညီ”ဟုလည်း အပြစ်တင် လိုကြ၏၊ သို့သော် ထိုကဲ့သို့ တရားမဟောဖို့ရန် စိတ်ညွတ်ခြင်းသည် လည်း သဘာဝကျပေ၏။
ရှင်းလင်းပြပါဦးမည် … ယခုခေတ် တိုင်းကျိုးပြည်ကျိုးကို တကယ့်စေတနာဖြင့် ဆောင်ရွက်နေသူအချို့ တို့သည် တစ်ရံတစ်ခါ “မဆောင်ရွက်တော့ပါဘူး”ဟု အကြံဖြစ်တတ်ကြ၏၊ ဘာ့ကြောင့် နည်း၊…မိမိ၏ တိုးတက်စေလိုသော စေတနာထားပုံနှင့် တိုင်းသူပြည်သားတို့၏ ထိုင်းမှိုင်းဖျင်းအပုံမှာ အလွန် ကွာခြားနေသည်ကို မကြာခဏပင် တွေ့မြင်ကြရသောကြောင့်တည်း၊
ဘုန်းကြီးလည်း သာသနာတော်အကျိုးနှင့် အမျိုးသားအကျိုးကို စွမ်းနိုင်သမျှ ဆောင်ရွက်နေ၏၊ တရားဟောရာ၌ ဒါနအကျိုးကိုချည်း မဟောဘဲ ကိုယ်ကျင့်ကောင်းအောင်လည်း ဟော၏၊ စာသင်ပေးရာ၌ ကြိုးကြိုး စားစား သင်ပေး၏၊ သို့သော် ဘုန်းကြီး ကြိုးစားသလောက် အထ မမြောက်သဖြင့် “ငါ့ဘာသာငါ အေးအေး စာကြည့်နေရတာက ကောင်းပါသေးရဲ့”ဟု မကြာခဏ စိတ်ဖြစ်၏၊ ထိုသို့ စိတ်ဖြစ်သော်လည်း မဟောဘဲ ပစ်မထားနိုင်၊ ဖြစ်ထိုက်သူတွေ ဖြစ်အောင်ဟု သဘောထား၍ ကြိုးစားလျက်ပင်။
ဗုဒ္ဓရှင်တော်မြတ်လည်း တရားတော်၏ သိမ်မွေ့နက်နဲပုံနှင့် တရားတော်၏ အလိုအားဖြင့် အနိစ္စ, ဒုက္ခ, အနတ္တချည်း ဖြစ်၍ တစ်လောကလုံး နှစ်သက်စရာ မရှိကြပုံကိုလည်းကောင်း, သတ္တ၀ါတို့၏ စိတ်ကလည်း နှစ်သက်တွယ်တာနေကြပုံကိုလည်းကောင်း မြင်တော်မူရ၍ ပြဒါးတစ်လမ်း သံတစ်လမ်းကဲ့သို့ တရား၏သဘော က တစ်လမ်း, သတ္တ၀ါတို့စိတ်၌ ထင်မြင်နေပုံက တစ်လမ်းဖြစ်နေရကား အားလုံးခြုံကြည့်လိုက်သောအခါ ဗြုန်းခနဲဆိုသလို တရား ဟော၍ မဖြစ်နိုင်စရာတွေကိုသာ မြင်တော်မူရကား တရားမဟော ဖို့ရန် စိတ်ညွတ်မိပါလိမ့်မည်၊
သို့သော် ထိုသို့ စိတ်ညွတ်မှုသည် စာထဲ၌ ထုတ်ဖော်ရေးပြရာဝယ် စကားကျယ်ဝန်းနေ သလောက် အကြာကြီး ဖြစ်နေသည် မဟုတ်ပါ၊ တရားတော်၏ သိမ်မွေ့နက်နဲ မှုတွေကို ဆင်ခြင်တော်မူရာဝယ် တစ်ခဏမျှ ဖြစ်ပေါ်သွားခြင်းသာ ဖြစ်ပါလိမ့်မည်၊ ထိုသို့ တစ်ခဏမျှ ဖြစ်ရခြင်းကား တရားတော်၏ နက်နဲပုံ, သတ္တ၀ါအများ၏ စိတ်ထားပုံကို နှိုင်းယှဉ်၍ ကြည့်သော အခါ အမှန်ဖြစ်ထိုက်၍ သဘာဝကျပါပေ၏၊ ထို့ကြောင့် ထိုတစ်ခဏ စိတ်ကလေး ညွတ်မိရုံမျှဖြင့် ဗုဒ္ဓအပေါ်၌ အပြစ်မတင်ထိုက်ပါ၊ ထို စိတ်ညွတ်ပြီးလျှင်ပြီးချင်း တရားဟောဖို့ရန် အကြံတော် ဆက်လက် ဖြစ်ခဲ့ပါသည်။
ဗြဟ္မာတောင်းပန်မှု
တရားဟောပြောဖို့ရန် ဗြဟ္မာကြီးလာ၍ တောင်းပန်ရခြင်းကား ဗုဒ္ဓစိတ်ညွတ်ပုံကို အသိမြန်သော ဗြဟ္မာဖြစ်၍ ချက်ချင်းတောင်းပန်လာခြင်း ဖြစ်၏၊ လာ၍ တောင်းပန်ချိန်၌ ဗုဒ္ဓကိုယ်တော်တိုင်မှာလည်း ထိုစိတ်ညွတ်မှု မရှိတော့ပါ၊ ကျမ်းစာတို့၌မူ ကမ္ဘာက ဗြဟ္မာကို ရိုသေနေခိုက်ဖြစ်၍ ဗြဟ္မာ၏ တောင်းပန်မှုကိုပင် အသားယူလျက် အကျယ်တ၀င့် ဖွင့်ပြ နေခြင်း ဖြစ်ပါသည်၊
အမှန်မှာ ယခုကာလ အများအကျိုးကို စေတနာရင်းဖြင့် ဆောင်ရွက်နေသူတို့သော်မှ ထိုကိစ္စမျိုးကို လက် မလွှတ်ကြသကဲ့သို့ ဗုဒ္ဓရှင်တော်မြတ်လည်း ဗြဟ္မာတောင်းပန်သည် ဖြစ်စေ, မတောင်းပန်သည်ဖြစ်စေ တရားဟောဖို့ရန် ကိစ္စကို မူလ ရည်ရွယ်တော်မူချက်အတိုင်း လက်လွှတ်တော်မူမည် မဟုတ်ပါ။
ထို့ကြောင့် “ဗုဒ္ဓရှင်တော်သည် နဂိုက တရားမဟောဖို့ရန် ကြံ၍ ဗြဟ္မာတောင်းပန်မှ ဟောတော်မူသည်”ဟူသော စကား၌ အရေး တကြီး ချဲ့ထွင်စဉ်းစားဖွယ် မလိုတော့ပါ။ [အသိမြန်သော ဗြဟ္မာမင်းလည်း နဂိုကပင် တရားဟောတော်မူစေလိုသော ဆန္ဒက ပြင်းပြလျက် ရှိခြင်းကြောင့် ချက်ချင်းလာ၍ တောင်းပန်ရှာပါသည်။]
Credit to
No comments:
Post a Comment