ပရိနိဗ္ဗာန်စံတော်မူခြင်း
ဤသို့ မိန့်တော်မူပြီးနောက် ……
ညောင်စောင်းငယ်ပေါ်မှာ လျောင်းမြဲ လျောင်းတော်မူလျက်သာလျှင် ဗုဒ္ဓရှင်တော်မြတ် လှုပ်တော်မမူပြီ၊ ပထမဈာန်မှ စ၍ အစဉ်အတိုင်း သမာပတ် ၀င်စားတော်မူကာ လွန်စွာငြိမ်သက်တော်မူ၏၊ ထိုအချိန်မှာ အရှင်အာနန္ဒာကိုယ်တိုင်ပင် ပရိနိဗ္ဗာန်စံတော်မူပြီဟု ထင်၍ အရှင်အနုရုဒ္ဓါကို မေးရလေသည်၊ အရှင်အနုရုဒ္ဓါက ပရိနိဗ္ဗာန် စံတော်မမူသေးကြောင်း နိရောဓ သမာပတ် (စိတ် စေတသိက် ချုပ်၍ ရုပ်တချို့သာ ရှိနေသော သမာပတ်)သို့ ရောက်နေကြောင်းကို မိန့်တော်မူ၏၊
ထိုသို့ ဈာန် သမာပတ်များကို ထပ်ပြန်တလဲလဲ ၀င်စားတော်မူသည်မှာ … သမာပတ်ပေါင်း အကြိမ်ပေါင်း … ကုဋေ နှစ်သန်းလေးသိန်း အရေအတွက် ရှိလေသည်၊ သမာပတ်အားလုံး ပြီးဆုံး၍ အရုဏ်ရောင်ခြည် ပေါ်လာသည်နှင့် တစ်ပြိုင်နက် ဗုဒ္ဓရှင်တော်၏ ၀ိညာဉ် တော်နှင့် (ကံကြောင့် ဖြစ်တည်လျက်ရှိသော) ရုပ်ဓာတ်တော်သည် (နောက်ထပ် အဆက်မရှိတော့ဘဲ) ခန္ဓာတော် ဇာတ်သိမ်း၍ ချုပ်ငြိမ်း တော် မူပါသတည်း။
လွမ်းဆွတ်ကြေကွဲ ၀မ်းနည်းကြပုံ
““ဗုဒ္ဓရှင်တော် ချုပ်ငြိမ်းတော်မူပြီ””ဟု သိသည်နှင့် တစ်ပြိုင်နက် အနာဂါမ် ရဟန္တာပုဂ္ဂိုလ်တို့ မှတစ်ပါး အခြားရဟန်းတော်များနှင့် နတ်တို့ သည် တချို့က လက်မောင်းကို မြှောက်၍ ငိုကြ၏၊ တချို့က အရုပ် ကြိုးဖြတ်လိုက်သလို တခါတည်း လဲကျသွားတော့၏၊ တချို့က လူးကာ လိမ့်ကာ ငိုရှာကြကုန်၏၊ နှုတ်ကလည်း …“ရှင်တော်မြတ်ပရိနိဗ္ဗာန် စံတော်မူတာ သိပ်မြန်တာပဲ, သိပ်မြန်တာပဲ၊ ကမ္ဘာလောက ထဲမှာ ပညာဉာဏ်မျက်လုံးတော် ကွယ်ရချေပေါ့”ဟု တတွတ်တွတ် ပြောကာ ပြောကာ ငိုကြရှာ၏၊ အနာဂါမ် ရဟန္တာဖြစ်ပြီးပုဂ္ဂိုလ်တို့ ကား သတိနှင့်ဉာဏ်ကို အသုံးပြုခြင်းဖြင့် ၀မ်းနည်းမှု မဖြစ်ပါ။
အရှင်အနုရုဒ္ဓါကမူ ငိုကြွေးသူတို့ကို “ငါ့ရှင်တို့…၀မ်းမနည်းကြနှင့်၊ ချစ်ခင်မြတ်နိုး အားကိုးစရာ ဖြစ်သူတို့နှင့် မခွဲချင်ဘဲလည်း ခွဲကြရ၏၊ ဖြစ်လာသော အရာဝတ္ထုမှန်သမျှ (ဗုဒ္ဓရှင်တော်၏ ခန္ဓာ ကိုယ်တော်ဖြစ်စေကာမူ) မပျက်ဘဲ အစဉ်တည်မြဲပါစေဟု တောင့်တ သော်လည်း မရနိုင်၊ ထိုအကြောင်းကို ဗုဒ္ဓရှင်တော် ရှိတော်မူစဉ် ကပင် မပြတ် မိန့်တော်မူခဲ့သည် မဟုတ်ပါလော၊ (၀မ်းမနည်းကြ, မငိုကြနှင့်၊ ၀မ်းနည်းနေလို့ ငိုနေလို့ အကျိုးမရှိတော့ပါ၊ ဗုဒ္ဓကို လွမ်းဆွတ်ကြလျှင် ဗုဒ္ဓအလိုတော်ကျအောင် တရားကိုသာ ကျင့်ကြပေတော့)”ဟု တရားပြတော်မူပါသည်။
ဤသို့လျှင် အရှင်အနုရုဒ္ဓါ, အရှင်အာနန္ဒာတို့၏ အားပေးစကား တရားစကားတို့ဖြင့် မလင်းသေးခင် အချိန်ကို ကုန်လွန်စေပြီးနောက် အလင်းရောက်သောအခါ ကုသိနာရုံမြို့တွင်းမှ မင်း မှူးမတ်ပရိသတ် တို့လည်း ထွက်လာကာ ငိုသူက ငို, အလောင်းတော်ကို ပူဇော်သူက ပူဇော်နှင့် မြင်မြင်သမျှ ရဟန်း ရှင် လူတွင်မက အနာဂါမ် ရဟန္တာ မဖြစ်သေးသော နတ် ဗြဟ္မာများပင် လွမ်းဆွတ်ကြေကွဲ ၀မ်းနည်း ကြလေသည်။ [အနာဂါမ်ကား ၀မ်းနည်းမှု ဒေါမနဿ မဖြစ်ပါ။]
နိဂုံးချုပ်
ဤနေရာဝယ် ဗုဒ္ဓရတနာအတွက် နိဂုံးချုပ်ရပါတော့မည်၊ လောက၌ စိတ်ရင်း စေတနာရင်း ကောင်းကောင်းနှင့် (ကိုယ်ကျိုး မငဲ့ဘဲ) ရပ်ကျိုး ရွာကျိုး နယ်ကျိုး တိုင်းပြည်ကျိုးကို ဆောင်ရွက်သူတို့ကား အလွန်ရှား၏၊ တစ်ယောက် တလေ ပေါ်လာလျှင် ထိုသူသည် (ဗုဒ္ဓအလောင်းတော်လား, အဂ္ဂ သာဝက, မဟာသာဝကနှင့် ပကတိသာဝကအလောင်းတော်လား, ပစ္စေကဗုဒ္ဓါအလောင်းတော်လား) တစ်ပါးပါး၏ အလောင်းအလျာတော့ ဧကန် ဖြစ်ပါလိမ့်မည်၊
ဘုန်းကြီးတို့ ဗုဒ္ဓရှင်တော်ကား… အလောင်းတော်ဘ၀ပေါင်း များစွာကလည်း လောကအကျိုး အမျိုးသား အကျိုးကို (ကိုယ်တိုင် အပင်ပန်း အနစ်နာခံ၍) ဆောင်တော်မူခဲ့ပြီ။
ဗုဒ္ဓဖြစ်ရာအခါလည်း နောက်ဆုံးအချိန်တိုင်အောင် သတ္တ၀ါ များ၏ ကောင်းကျိုးကို (အလွန် အားနည်းနေပါလျက်နှင့်) ဆောင်တော်မူသေး၏၊ ယခုအထိ ဘုန်းကြီးနှင့်တကွ ဗုဒ္ဓကို ယုံကြည် လေးစားသူတို့ ကိုယ်စီကိုယ်င စိတ်နေစိတ်ထားကို ပြုပြင်၍ ပါရမီ ဖြည့်ကာ နိဗ္ဗာန်ကို မှန်းလျက် အလုပ် လုပ်နိုင်သည်မှာလည်း ဗုဒ္ဓ ရှင်တော်၏ သြ၀ါဒတော်ကြောင့်ပင် ဖြစ်၏၊
ထို့ကြောင့် ထိုဗုဒ္ဓ ရှင်တော်ကို ရည်ရော်မှန်းဆ၍ “တံ ဗုဒ္ဓံ သရဏံ ဂစ္ဆာမိ=ထိုဗုဒ္ဓကို ကိုးကွယ်ဆည်းကပ်ပါ၏”ဟုသာ ကိုယ် နှုတ် စိတ်ပါ ကိုးကွယ် ဆည်းကပ်လျက် မိမိ တတ်နိုင်သည့်ဘက်က ဗုဒ္ဓ၏ အမွေအနှစ် သာသနာကို ထမ်းဆောင်နိုင်ကြပါစေသော်။
ဗုဒ္ဓရတနာအခန်း ပြီးပြီ။
Credit to
No comments:
Post a Comment