အနတ္တလက္ခဏသုတ်တော်
အတ္တ၏ပုံသဏ္ဌာန်နှင့် တည်နေရာ
အနတ္တလက္ခဏသုတ်ကို သိလိုသူတို့သည် ရှေးဦးစွာ အတ္တအယူဝါဒကို နားလည်သင့်ကြ၏၊ အတ္တနှင့် စပ်၍ နားလည်ဖွယ်တို့ကား… အတ္တ၏ ပုံသဏ္ဌာန်, အတ္တ၏ တည်ရာ, အတ္တ၏ နာမည်, အတ္တ၏ သတ္တိ, အတ္တ၏ စွဲချက်များတည်း၊ “အတ္တ” ဟူသည် အစစ်အမှန်ရှိသောအရာ မဟုတ်၊ ဗုဒ္ဓမပွင့်ရာခေတ်၌ ပရမတ္ထသဘာဝဓမ္မကို ကျနစွာ မသိသော ပညာရှိတို့ အမျိုးမျိုး အဖုံဖုံ တွေးဆကြည့်သောအခါ “ဒီလို ဖြစ်တန်ရာ၏”ဟု ကြံစည် မှန်းဆအပ်သော အရာသာတည်း၊
ထို့ကြောင့် အစစ်အမှန်မဟုတ်သော အတ္တ၏ပုံသဏ္ဌာန်ကို ကြံစည်ကြရာ၌ ဆရာ တစ်ဦးနှင့်တစ်ဦး အယူအဆ မတူကြသည်မှာ ဓမ္မတာပင် ဖြစ်၏၊ ဥပမာ…မိန်းမမြုံမ၏ သားကလေးပုံသဏ္ဌာန်ကို ကြံကြံဖန်ဖန် တွေးရာ၌ တစ်ယောက် နှင့်တစ်ယောက် မတူနိုင်သကဲ့သို့တည်း။
ထို့ကြောင့် ဆရာတချို့က “အတ္တသည် အလွန့်အလွန် သေးငယ်၏၊ ပရမာဏုမြူခေါ်(လူတို့မျက်စိဖြင့် ကြည့်၍ မမြင်နိုင်သော) အသေးငယ်ဆုံး မြူမှုန်မျှလောက်သာ ရှိ၏”ဟု ယူဆကြ၏၊
နိဂဏ္ဌ နာဋပုတ္တဟု ထင်ရှားသော (ဂျိန်း) ကျမ်းဆရာတို့ကမူ “အတ္တသည် ခန္ဓာကိုယ်တစ်ခုလုံး ပျံ့နှံ့နေ၏၊ ခန္ဓာအိမ် ကြီးသလောက် အတ္တလည်း ကြီး၏”ဟု ဆိုကြ၏၊
ဝေဒန္တကျမ်းဆရာတို့ကား“အတ္တဟူသည် ကမ္ဘာကို ဖန်ဆင်းသော ဗြဟ္မာကြီး၏ အစိတ်အပိုင်းဖြစ်ရကား ဗြဟ္မာ တန်ခိုးကြီးသလို အတ္တလည်း တန်ခိုးကြီး၏၊ ကြီးမားသင့်သောအခါ၌ ကြီးမားသော ပမာဏရှိ၏၊ ခန္ဓာကိုယ်ဟောင်းကို စွန့်၍ ခန္ဓာ အိမ်သစ်ကို ရှာနေခိုက်မှာ အလွန်သေးငယ်သော ပမာဏရှိ၏”ဟု ဆိုကြ၏၊
တချို့က “အတ္တသည် ဗြဟ္မာ၏ အစိတ်အပိုင်း ဖြစ်သည့် အားလျော်စွာ တစ်ခုတည်းသာ ရှိ၏”ဟု ယူ၍ တချို့ကား “ခန္ဓာအိမ် တစ်ခုလျှင် အတ္တတစ်ခုစီ ရှိ၏”ဟု ယူဆကြလေသည်၊ ဤကား အတ္တ၏ ပုံသဏ္ဌာန်ကို ကြံစည်ကြပုံတည်း။
ဂျိန်းဆရာတို့အလို “အတ္တသည် ခန္ဓာကိုယ် တစ်ကိုယ်လုံး၌ ပျံ့နှံ့တည်နေ၏””ဟု ဆိုလို၏၊ မိတက္ခရကျမ်း၌ကား နှလုံးသား၏ ၀ဲယာနှစ်ဖက်မှ အထက်သို့ တက်၍ နှာခေါင်းပေါက်နှင့် ဆက်စပ် တည်နေသော အကြောကြီးနှစ်ခု တည်ရှိကုန်၏၊ ထိုအကြောတို့ သည် ထွက်သက် ၀င်သက်လေတို့၏ သွားလာရာလမ်း ဖြစ်ကုန်သတတ်၊ အခြား အကြောကြီးတစ်ခုကား နှလုံးသားမှ အထက်သို့ တက်၍ ဦးခေါင်း၌ရှိသော အပေါက်သို့ ဆိုက်ရောက်၏၊ (ငယ်ထိပ် သို့ ရောက်သည်ဟု ဆိုလိုဟန်တူသည်၊) ထိုအကြော သုံးခုတို့၏ အလယ်၌ လရောင်ကဲ့သို့ အရောင်အ၀န်း ရှိ၏၊ ထိုအရောင်အ၀န်း၏ အလယ်၌ အတ္တသည် (လေငြိမ်ရာ၌ ထွန်းအပ်သော ဓာတ်မီး ကဲ့သို့) မတုန်မလှုပ် တောက်ပတည်နေသည်ဟု ဆိုသတတ်၊ ဤကား အတ္တ၏ တည်ရာဌာနကို ကြံဆကြပုံတည်း။
No comments:
Post a Comment