ကမ္မဋ္ဌာန်းဘုန်းကြီးတစ္ဆေ
ဂန္ဓာရုံကျောင်းတိုက်အနီး ကျောင်းတစ်ကျောင်းဝယ် တရားအားထုတ် ပြီး ရိပ်သာမှ ပြန်လာသော ကြီးမှ ရဟန်းပြုသော ပုဂ္ဂိုလ်နှစ်ပါးရှိ၏၊ မကြာမီ တစ်ပါး ပျံတော်မူ၍ ဆိုင်ရာ ဆွေမျိုးတို့ လာပြီးလျှင် ထို ကျောင်း၌ ခုနစ်ရက်လည်သည့်တိုင်အောင် နေကြ၏၊ ဆွေမျိုးများ ပြန်သွားပြီးနောက် ညဥ့်အချိန်ရောက်သောအခါ ကျန်ရှိသော တစ်ပါးက မီးထွန်း၍ ပြတင်းပေါက်တံခါးတို့ကို ပိတ်၏၊ တစ်စုံ တစ်ယောက်က ဖွင့်လေသည်၊ ထပ်ပိတ်ပြန်၏၊ ထပ်၍ ဖွင့်ပြန်သည်၊
ထို ကိုယ်တော်သည် ကုဋီသွားချင်စိတ်ရှိ၍ ကျောင်းဘေးနားက ကုဋီကလေးသို့ ဆင်းသွားသောအခါ ထိုကုဋီထဲ၌ ပျံလွန်ပြီးသော ဦးပဉ္စင်းကြီး ထိုင်နေသည်ကို မြင်ရပါသည်တဲ့၊… ကျန်ရစ်သော ကိုယ်တော်သည် ကျောင်းပေါ်သို့ ပြန်တက်လာပြီးလျှင် ““မင့်ကို လူတုန်းကမှ မကြောက်ဘဲ, တစ္ဆေဖြစ်မှ ကြောက်ရမှာလား””ဟု ကြုံးဝါး၍ ကမ္မဋ္ဌာန်းသက်စောင့်ဓားရှည်ကြီးကို ခုတင်ပေါ်သို့ တင်လိုက်ပါသတဲ့၊ ထိုဓားရှည်ကို တစ္ဆေကိုယ်တော်က ယူ၍ လွှင့်ပစ် လိုက်သောအခါ ကျန်ရစ်သော ကိုယ်တော်သည် မကြောက်သော် လည်း… ““တစ်ညလုံး အိပ်ရတော့မှာ မဟုတ်””ဟု တွေး၍ သူ့ အိပ်ရာလိပ်ကလေးကို ယူပြီးလျှင် တခြားကျောင်းသို့ ထွက်သွား သောအခါ နောက်က လိုက်၍ (မသွားစေလိုသည့် သဘောဖြင့်) အိပ်ရာလိပ်ကို ဆွဲထားပြန်သည်တဲ့။
မှတ်ချက်။ ။ ဤသို့ တစ္ဆေခြောက်ပုံကို မိမိကျောင်းတိုက်က စာချ ဘုန်းကြီးတစ်ပါး သိ၍ ပြောပြသောကြောင့် တစ္ဆေ ခြောက်ရာ၌ ““ံကြောက်စေလို၍ ခြောက်ခြင်း, ချစ်၍ ကစားသော အားဖြင့် ခြောက်ခြင်း စသောအားဖြင့် အမျိုးမျိုး ရှိလိမ့်မည်””ဟု တွေးမိပါသည်၊ [ထို တစ္ဆေသည် လူပယောဂဆရာက နှင်သော ကြောင့် ထွက်သွားရသည်ဟု ကြားရသောအခါ လူက နှင်သော ကြောင့် သွားရခြင်းကို မိမိစိတ်၌ မခံချင် ဖြစ်လာပါသည်၊ မိမိကားဘုန်းကြီးတစ္ဆေကို ဘုန်းကြီးက မေတ္တာရပ်ခံသောကြောင့် မခြောက်တော့ဟုသာ ကြားချင်ပါသည်။]
ကျောင်းထိုင်တစ္ဆေ
ကျောင်းတိုက်တစ်တိုက်၌ ကျောင်းဆောက် မပြီးသေးခင် ကျောင်းဘုန်းကြီး ပျံလွန် တော်မူ၏၊ ပျံလွန်တော်မူ၍ သိပ်မကြာခင် နေ၀င်သောအခါ ထို ကျောင်းပေါ်၌ လက်သမား အလုပ် လုပ်သကဲ့သို့ ဟိုခေါက် ဒီခေါက်နှင့် ခေါက်လေ့ ရှိသတတ်၊ ကျန်ရစ်သော တပည့်များက အခြား စာချဘုန်းကြီးကို ပင့်၍ ထိုအချိန်၌ သွားရောက်စုံစမ်းသောအခါ ရှေးရှေး ညဥ့်များကဲ့သို့ သံရိုက်နေသံကို ကြားရပါသည်တဲ့။
ဂန္ဓရုံထွက်တစ္ဆေ
ဂန္ဓရုံ၌ ကိုရင်ဘ၀က နေသွားသော စာတော်သော ကိုရင်တစ်ပါးသည် မန္တလေးသို့ ပြောင်း ရွှေ့နေထိုင်ပြီးနောက် သူ့အရပ်သို့ ရောက်သောအခါ ရဟန်းဖြစ်၏၊ ရဟန်းဖြစ်၍ မကြာခင် ပျံတော်မူသောအခါ တစ္ဆေ ပြိတ္တာ ဖြစ်၍ သူ့နေရာကျောင်းသို့ ၀င်ဖို့ရန်အစောင့်အရှောက် နတ်များထံ အကြိမ်ကြိမ် ခွင့်တောင်းပြီးမှ ၀င်ခွင့်ရသဖြင့် ကျောင်းတိုက်ရှိ ပုဂ္ဂိုလ်တစ်ယောက်ကို ပူး၍ သူ၏ ဖြစ်ပုံ အကြောင်းကို ပြောပြ ပါသည်တဲ့။
ငါမသွားဘူး မင်းသွား
ကျောင်းတစ်ကျောင်း၌ ဘုန်းကြီးတစ်ပါး ပျံတော်မူရာ… တပည့်ကိုယ်တော်က ကျောင်းကို ဆက်၍ အုပ်ချုပ်လေသည်၊ ထို့နောက် ကျောင်းဘုန်းကြီး က မိမိဆရာ ဘုန်းကြီး ထိုကျောင်းမှာ ရှိနေကြောင်းကို သိ၍ ညဥ့်အခါ၌ ပဋ္ဌာန်းပါဠိတော်ကို ရွတ်၏၊ နံနက်ရောက်သောအခါ ကွယ်လွန်သော ဆရာဘုန်းကြီးက လူတစ်ယောက်ကို ပူး၍ ပြော သည်မှာ ““ညဥ့်တုန်းက ငါ့ကို မနေစေချင်လို့ မောင်အ၀ှာက ပဋ္ဌာန်း ရွတ်လိုက်တာ နားကို ပူလို့, ငါ မသွားဘူး, မင်းသွား””ဟု ပြောပါ သည်တဲ့။
ဂူအောင်းတစ္ဆေ
ဘုန်းကြီးအခေါ်ခံရသူ တစ်ဦးကား “ဂူထဲ၌ ခုနစ်ရက်လုံးလုံး အစာမစားဘဲ နေနိုင်သည်” ဟူသော ကြွေးကြော်သံဖြင့် အရပ်တော်တော်များများသို့ လှည့်လည် ပြီးနောက် ပြည်မြို့ ရောက်သောအခါ စုံစမ်းလိုသော ကျောင်းအမ နှင့် တွေ့၍ မည်သူမျှ အနားမလာရဘဲ ခိုင်မာသော အုတ်ဂူ လုပ်ပြီး လျှင် ထိုဂူအတွင်း၌ ၀င်နေစေ၏၊ အခြားနေရာ၌မူ အသက်ရှူပေါက် ရဖို့ လူမသိအောင် အပေါက်ထား၍ အစာသွင်းနိုင်အောင် သူ့လူ များက ကြံနိုင်သော်လည်း ထိုနေရာ၌ မကြံနိုင်ရကား ခုနစ်ရက် ပြည့်၍ ဖွင့်ကြည့်သောအခါ တံခါးအနီး၌ သေနေသည်ကို တွေ့ရ သတတ်၊ ထိုနေရာ၌ တစ္ဆေခြောက်၍ မသွားဝံ့ကြ၊ သို့သော် ထိုသို့ သေသွားပြီးနောက် သူ့ကို ယုံကြည်သော အခြားအရပ်က ဒကာ အချို့ ရောက်လာသောအခါ ထိုဂူနေရာကို အလွန်ရိုသေစွာ ရှိခိုးကြပါသည်တဲ့။ [အလွန် ရိုးသော အသော လူမျိုးပါပေ။]
နိုင်ငံရေးဘုန်းကြီးတစ္ဆေ
နိုင်ငံရေးကို ရွက်ဆောင်နေသောဆရာတော်တစ်ပါးလည်း ပျံတော်မူ သောအခါ တစ္ဆေ ပြိတ္တာ ဖြစ်နေပုံကို အမြင်ပေါက်သော ဆရာက “မန္တလေး ဈေးချိုနှင့် ကျုံးအကြားဝယ် သွားလာနေသည်ကို မြင်ရ သည်”ဟု ပြောကြောင်းကို ဒကာတစ်ယောက်လျှောက်၍ သိရသည်။
ညှိုးငယ်နေသော ဘုန်းကြီးနှစ်ပါး
တစ်နေရာ၌ကျောင်းကိုယ်စီဖြင့် ဘုန်းတော်ကြီးနှစ်ပါး ရှိ၏၊ အနေအထိုင်လည်း မညံ့၊ အများသံဃာနှင့်လည်း ဆန့်ကျင်ခြင်း မရှိ၊ ချစ်ခင် ကြည်ညိုသူ များ၏၊ ထိုကိုယ်တော်နှစ်ပါးသည် သူ့နေရာနှင့်သူ အသီးသီး ပျံတော်မူလေသော် သူတို့ကို သိသော ““အမြင်အထင် ပေါက်သည်””ဟု ဆိုသူ တစ်ယောက်က သင်္ကန်းဝတ်လျက်ပင် ညှိုးညှိုးငယ်ငယ် နေကြရပုံကို မြင်ရပါသည်တဲ့။
စဉ်းစားဖွယ်။ ။ထိုကိုယ်တော်နှစ်ပါးသည်““ဘာ့ကြောင့် ထိုကဲ့သို့ ဖြစ်ရပါသနည်း””ဟု စဉ်းစားသည် ရှိသော် ခေတ်အလိုက် လာဘသက္ကာရကို လိုလားမှုကား ကင်းနိုင်ရှာကြမည် မဟုတ်ချေ၊ ငွေ စသော နိသဂ္ဂိ ပစ္စည်းများလည်း ခေတ်အလိုက် ကင်းနိုင်ရှာကြမည် မဟုတ်ချေ၊ ထို့ကြောင့် ထိုကဲ့သို့ ဖြစ်ရသည်ဟု စဉ်းစားမိပါသည်။
No comments:
Post a Comment