အနာဂတ်သာသနာရေး အပိုင်း(၁၃၄) ဘုန်းကြီးပျံ ကြာရှည်ထားပြစ်

ဘုန်းကြီးပျံ ကြာရှည်ထားပြစ်

ယခုကာလ၌ ဘုန်းကြီးပျံကို ကြာရှည်ထား လေ့ရှိခြင်း, ကြာရှည်ထားလေ့ မရှိခြင်းဟု နှစ်မျိုးရှိ၏၊ ကြာရှည်ထားခြင်း၌ ရည်ရွယ် ချက်ကား ရပ်ဝေးတပည့်များ လာရောက်မီအောင် စောင့်ဆိုင်း လိုခြင်း, ဒကာ ဒကာမများ၏ ဘုန်းကြီးပျံ၌ ကုန်ကျဖို့ရန် ငွေရှိချိန် ကို စောင့်လိုခြင်းများ ဖြစ်၏၊ ထိုတွင် အဝေးတပည့်များ လာရောက် ၍မှ သင်္ဂြိုဟ်ခြင်းလည်း တစ်နည်းအားဖြင့် ထိုမှရမည့် အကူအညီ တို့ကို မျှော်လင့်ခြင်းပင် ဖြစ်၏၊ ထိုသို့ မဟုတ်ဘဲ “အဝေးတပည့် များ နောက်ဆုံး ကန်တော့ခြင်းဖြင့် ကန်တော့စေလိုသောကြောင့် ထားရပါသည်”ဟု ဆိုလျှင် အလောင်းကို မမီလိုက်ဘဲ ဂုဏ်ကို မှန်း၍ ကန်တော့လျှင်လည်း ပြီးနိုင်ပြီဖြစ်၍ ထိုအကြောင်းလည်း မလုံ လောက်သေးချေ၊ အမှန်မှာ “ပွဲနှင့်လမ်းနှင့် စည်စည်ကားကား ဖြစ်စေလိုသောကြောင့် ကြာရှည် ထားကြသည်”ဟု ထင်စရာ အကြောင်းရှိ၏၊ ထိုသို့ ကြာရှည်ထား၍ စည်စည်ကားကား ကျင်းပ ခြင်း၌ အောက်ပါ အပြစ်များကို တွေ့ရလေသည်။

၁။       အလောင်းကို စောင့်ရှောက်ရမှုကြောင့် ပရိယတ်ကျောင်းတိုက် ဖြစ်လျှင် စာသင်စာချ ပျက်ခြင်း, ပဋိပတ်ကျောင်းတိုက်၌ ပဋိပတ်အကျင့် လစ်ဟင်းခြင်း၊

၂။       ဒကာ ဒကာမတို့ အလုပ်အကိုင် ပျက်၍ အကုန်အကျများခြင်း, ထိုကုန်ကျရာ၌ တချို့ ဒကာ ဒကာမများကား မရှိမဲ့ရှိမဲ့နှင့် သူများနည်းတူဖြစ်အောင် ကြံစည်၍ ထည့်ရခြင်း, တချို့လည်း စိတ်မပါဘဲ  ရပ်ရွာနှင့်  မဆန့်ကျင်အောင်  ထည့်ရခြင်း၊         [ ထို့ကြောင့် “ဘုန်းကြီးသေ ရွာကြေ”ဟု ဆိုကြသည်။]

၃။       ပွဲလမ်းသဘင်တွေ များ၍ ကြည့်ရှုသူတို့မှာ ကျန်းမာရေး ချွတ်ယွင်းတတ်ခြင်း၊

၎။       တာဝန်ဆောင်ပုဂ္ဂိုလ်များဝယ် အလုပ်များသော ရဟန်းငယ် ရှင်ငယ်တို့မှာ အပြင်းအထန် ကျန်းမာရေး ချွတ်ယွင်းတတ်ခြင်း၊ [“နာမည်ကြီးဆရာတော်တစ်ပါး ပျံလွန်တော်မူရာ၌ နောက်ပါ နှစ်ပါး သုံးပါး ခေါ်သွားတတ်သည်” ဟု ပြောစမှတ် ရှိ၏၊ ဆိုလိုရင်းကား… ဆရာတော်ပျံ၌ လုပ်ကိုင်ရသောကြောင့် မကျန်းမာ၍ နှစ်ပါး သုံးပါး ပျံတော်မူတတ်သည်ဟု ဆိုလိုသည်၊၊]

၅။       ၀က် ကြက်စသော သတ္တ၀ါအများလည်း ဘုန်းကြီးပျံကို အကြောင်းပြု၍ သေကျေရခြင်း၊ [ ဆရာတော်တစ်ပါး၏ ဘုန်းကြီးပျံသို့ တပည့်အများ သွားကြရာ ညဥ့်အခါ၌ သဲသောင် ပြင်ထက်တက်၍ နားနေခိုက်ဝယ် ကပ်လာသော လှေကြီး တစ်စင်းပေါ်မှာ သတ်ပြီး ကြက်ကောင်တွေ အပြည့်တင်လာသည်ကို မြင်၍ “ဘယ်သွားမလို့လဲ မေးရာ” “ဆရာတော်ဈာပန သွားမလို့”ဟု ဖြေသည်ကိုကြားခဲ့ရကြောင်း ကိုယ်တွေ့တစ်ဦးက လျှောက်ဖူးသည်။]

၆။       ဘုန်းကြီးပျံကို နာမည်ခံ၍ ဟိုဟိုသည်သည် အလှူခံကာ စီးပွား ရှာလိုသူတို့ မတရားသဖြင့် စီးပွားရှာခွင့်ရခြင်း၊ ဤသို့စသည်ဖြင့်လက်တွေ့အပြစ်တွေ များပြားရကား အောက်ပါစည်းကမ်းချက် အတိုင်း ဘုန်းကြီးပျံကိစ္စကို ပြုပြင်သင့်ကြပါသည်။

ဘုန်းကြီးပျံ ပြုပြင်ရေး

မိမိတို့၏ဆရာသမားကို လေးစားသော တပည့် ဒကာ ဒကာမတို့သည် မကျန်းမာကြောင်းသိလျှင် အစွမ်းကုန် ကြိုးစား၍ (၀ိနည်းတော်နှင့်လည်း ညီစွာ) ကုသသင့်၏၊ အကောင်းဆုံးဆရာနှင့် ဆေး, ဓာတ်စာများကို မိမိတို့ အစွမ်းအားလျော်စွာ ရှာဖွေဆက်ကပ်သင့်၏၊ ထိုဘုန်းတော် ကြီးသည် မနေသာ၍ ပျံတော်မူရစေကာမူ တပည့် ဒကာ ဒကာမတို့ အပေါ်မှာ မေတ္တာများများနှင့် ကျေကျေနပ်နပ် ပျံတော်မူရပေလိမ့်မည်၊ ပျံတော်မူကြောင်း ဧကန်သိရသည့်အခါ၌ကား အချိန်ရှိသေးလျှင် အနီးအပါးရှိ တပည့်များနှင့် ဒကာ ဒကာမတို့သည် နောက်ဆုံး ပူဇော်ခြင်းဟု သဘောထား၍ မိမိတို့အိမ်မှာ အသင့်ရှိသော ဆီနံ့သာတုံးဖြင့် အမြန်ဆုံး မီးသင်္ဂြိုဟ်သင့်၏၊ အချိန်မရှိလျှင်ကား တစ်ညဥ့်မျှ ထား၍ နောက်တစ်နေ့တွင် ကိစ္စပြီးစေသင့်၏။

          ကြီးကျယ်သော ဆရာတော်ဖြစ်၍ ခပ်လှမ်းလှမ်းမှတပည့်များ နေ့ချင်း ရက်ချင်း မရောက်နိုင်ပါမူ သုံးရက်မျှ ထားသင့်ကြ၏၊ ထို့ထက် ပို၍ကား မည်သည့်နည်းနှင့်မျှ မထားသင့်ပေ၊ အရှင်သာရိပုကြာ, အရှင်မောဂ္ဂလ္လာန်စသော ရဟန္တာကြီးများ ပရိနိဗ္ဗာန် စံတော်မူရာမှာပင် နေ့ချင်း ညချင်း ပြီးစေပုံကို အတုယူသင့်ပါသည်၊ ဗုဒ္ဓရှင်တော်ပရိနိဗ္ဗာန် စံတော်မူရာ၌ကား ပြင်ဆင်၍ မပြီးနိုင်သောကြောင့်သာ မီးမသင်္ဂြိုဟ်ရသေးခင် ခုနစ်ရက်မျှ ကြာသွားပါသည်။

တင်ပြသူ Yanan Saneinအချိန် 11:56 AM