ရာဇဂုရုတချို့
ရဟန်းခံကိစ္စတစ်ခုကြောင့် သံဃာအများစုမိရာ သိမ်အတွင်း၌ … ဆရာတော်ကြီး တစ်ပါးက သြ၀ါဒပေးရင်း “ကိုယ်တော်တို့ ကောင်းကောင်း နေကြပါ၊ ရှင်ဘုရင် လက်ထက်တုန်းက ရာဇဂုရုတံဆိပ်ရ တချို့သော်မှ ပြိတ္တာဘ၀၌ ရောက်နေကြသည်”ဟု အထင်အမြင် ပေါက်နေသော ပြာသာဒ် အုတ်ကျောင်းဆရာတော်က အမိန့်ရှိသည်ဟု ပြောပါသတဲ့။
မှတ်ချက်။ ။ ရာဇဂုရုတချို့ဟု ဆိုသဖြင့် ကောင်းမွန်စွာကျင့်တော်မူကြသော ရာဇဂုရုဆရာတော်များ မပါဝင်ဟု မှတ်ပါ၊ မှန်၏၊ ရာဇဂုရုပင် ဖြစ်သော်လည်း ရှင်ဘုရင်က ထောက်ပံ့ သော ဆန်များကို ဆွမ်းမချက်တော့ဘဲ ရောင်းစားကြသောကြောင့် တချို့ဆရာတော်များအား ““ဆန်တော်ပါဘုရား””ဟု လျှောက်၍ ငွေကို လစဉ် ထောက်ပံ့ကြရပါသည်တဲ့၊ ထိုသို့ ဖြစ်လျှင် ယခုအခါ အဂ္ဂမဟာပဏ္ဍိတ တချို့အတွက် စဉ်းစားစရာပေ။
ဘုရားလူကြီးပြိတ္တာတွေ
လွန်ခဲ့သော တမြန်နှစ်လောက်က…ဘုန်းကြီးနှင့်စပ်သော ဆိုင်ရာဂုဏ်းဝင် ဒကာအချို့သည် အထက်၌ ထင်ရှားသော ဘုရားများကို အဖူးမြော် သွားကြ၏၊ မြို့တစ်မြို့သို့ ရောက်သောအခါ ဒကာတစ်ယောက်သည် ထင်ရှားသော ဘုရားကုန်းတော်ပေါ်သို့ ညဥ့်အချိန် တစ်ယောက် တည်း တက်သွား၍ ဘုရားစာများကို ရွတ်ပြီးလျှင် ကုသိုလ်အဖို့ကို အမျှဝေသောအခါ ဘုန်းကြီးတစ်ပါးလည်း ပါဝင်သော ဘုရားလူကြီးတွေဟု ထင်ရသော ပြိတ္တာအချို့သည် အလွန် ဆိုးရွားသော ရုပ်အဆင်းဖြင့် သာဓုခေါ်ဖို့ရန် ပါးစပ်မှ အသံမျှ မထွက်နိုင်သော ကြောင့် အလွန် ပင်ပန်းစွာ ခံနေရသည်ကို တွေ့ရပါသည်တဲ့။ [ထို အရပ်ရှိ လူတို့က ထိုဘုန်းကြီး၏ ဘုရားနှင့်စပ်၍ မတရားစီးပွား ရှာပုံကို ပြောပြလိုက်ပါသည်တဲ့။]
မန္တလေး ဈေးချို အနောက်ဘက်၌ ဒကာမတစ်ယောက် သေပြီးနောက် ဆယ်လကျော်မှ ထိုအမျိုးအိမ်၌ လူ (မိန်းမ) ပြန်၍ ဖြစ်လာ၏၊ စကားပြောတတ် သောအခါ “ဒီအ၀တ်လဲ ငါ့ဟာ, ဟိုအ၀တ်လဲ ငါ့ဟာ, ဒီပစ္စည်းလဲ ငါ့ဟာ”ဟု ရှေးဘ၀တုန်းက သူ့ပစ္စည်းများကို ပြောသဖြင့် ““ညည်း ဒီအိမ် မ၀င်စားခင်က ဘယ်မှာ ဖြစ်နေသလဲ””ဟု မေးကြသောအခါ ““ဒီလမ်းထဲမှာပဲ ဖြစ်နေတယ်””ဟု ပြော၏၊ ““ညည်း လူတွေကို မကြောက်ဘူးလား””ဟု မေးသောအခါ ““လူကြီးတွေကို မကြောက် ပါဘူး, ကလေးတွေကတော့ တုတ်နဲ့ ခဲနဲ့ ဟိုဟိုဒီဒီ ပစ်တဲ့အခါ သူတို့ကိုလည်း မှန်တတ်လို့ ကလေးတွေကို ကြောက်တယ်””ဟု ပြော၏။
““ညည်းမပျင်းဘူးလား””ဟု မေးသောအခါ ““မပျင်းပါဘူး, ဒီလမ်းထဲမှာ အဖော်တစ္ဆေတွေ အများကြီးပဲ””ဟု ပြော၏၊ ““ညည်းတို့ ဘာစားနေတုံး””ဟု မေးသောအခါ ““လူတွေပစ်တဲ့ ထမင်းလုံး ဟင်းဖတ်နဲ့ သလိပ် ချွဲတွေကို စားနေကြတယ်၊ အမေ ဆွမ်းတော်တင်ပြီး အမျှဝေတဲ့အခါ သာဓုမခေါ်ပါဘူး၊ ဆွမ်းတော်စွန့်တော့ လုစားကြတာပဲ””ဟု တစ္ဆေပြိတ္တာတို့ရဲ့ သဘာဝကို ပြောပြပါသည်တဲ့။ [ထိုအမျိုး၏ သူတော်ကောင်းပုံကို သတိပြုပါ။]
အာဂန္တုဘုန်းတော်ကြီးများ
မြို့တစ်မြို့မှ မိမိကျောင်းသို့လာ၍ရှင်ပြုသော အလှူ့ဒကာ တစ် ယောက်သည် သူ၏ဆိုင်ရာမြို့မှ ဘုန်းတော်ကြီးများကိုလည်း ပင့်ခဲ့၏၊ နံနက်၌ ထုံးစံအတိုင်း သြ၀ါဒပေးရင်း အလှူရေစက်ချသောအခါ ဘုန်းကြီးဘ၀မှ တစ္ဆေပြိတ္တာ ဖြစ်သွားကြသော ပြအပ်ခဲ့သော ၀တ္ထုများကို ထည့်သွင်း ဖော်ပြလိုက်၏၊ ထိုဘုန်းတော်ကြီးများသည် မိမိတို့ တည်းခိုရာကျောင်းသို့ ရောက်သောအခါ ““ဆရာတော်က သူကြားဖူးသော ၀တ္ထုတို့ကိုသာ ပြောပြတာပါ၊ မိမိတို့နယ်၌လည်း ဒီလို ၀တ္ထုမျိုးတွေ ရှိပါသေးတယ်””ဟု ကျောင်းနေ ဆွမ်းစားကျောင်း ဘုန်းကြီးအား ထိုဝတ္ထုများကို ပြောပြကြသည်တဲ့။
ဗုဒ္ဓတရားတော်
[အန္တီဘူတော အယံ လောကော, တနုကေတ္ထ ၀ိပဿတိ၊
သကုဏော ဇာလမုတ္တောဝ, အပ္ပော သဂ္ဂါယ ဂစ္ဆတိ။]
လူရော ရှင်ပါ ဤသတ္တ၀ါအပေါင်းသည် မောဟတည်းဟူသော အမှောင်က ဉာဏ်မျက်စိကို ဖုံးလွှမ်းထား သောကြောင့် အကြောင်း အကျိုး အကောင်း အဆိုးတို့ကို မမြင်စွမ်း နိုင်သော သူကန်းသဖွယ် ဖြစ်၍ နေ၏၊ ငုံးစသော ငှက်အုပ်ကြီးကို မုဆိုးက ပိုက်ကွန်ဖြင့် လွှမ်း၍ ဖမ်းလိုက်သည်ရှိသော် ပိုက်ကွန်မှ လွတ်ထွက်နိုင်သော ငှက်သည် တစ်ကောင်တလေသာ ရှိတော့ သကဲ့သို့ ထို့အတူ အနည်းငယ်သော သတ္တ၀ါသည်သာ သုဂတိဘ၀ သို့လည်းကောင်း, နိဗ္ဗာန်သို့လည်းကောင်း ရောက်နိုင်သည်။ [ဓမ္မပဒ, ပေသကာရဓီတာဝတ္ထု။]
လူများလည်း သတိထားဖွယ်
ဤတရားတော်နှင့်အညီ စဉ်းစားသည်ရှိသော် အိမ်ရာ တည်ထောင် လူ့ဘောင်ကို စွန့်ခွာ၍ ရဟန်းဘ၀၌ ရောက်နေကြသောပုဂ္ဂုလ်များသာမက လူ့ဘောင်၌ ပေါ့ပေါ့ဆဆနေကြသော ငါးပါးသီလကိုမျှ လုံခြုံအောင် မထိန်းနိုင်သော လူဝတ်ကြောင်များလည်း “ပရလောက” နောက် ဘ၀ကို ယုံကြည်ကြလျှင် ပရလောက၌ အကျိုးများဖွယ် မရှိသော ဂုဏ် ပကာသန ဒါန သီလ ဘာဝနာမှုတို့ကို ပြုမည့်အစား အကျိုးများသော ငါးပါးသီလကိုလည်းကောင်း, အသက်မွေးဝမ်းကျောင်း စင်ကြယ်သော အာဇီဝဋ္ဌမကသီလကိုလည်းကောင်း, ဒုစရိုက် ဆယ်ပါးမှ ရှောင်ကြဉ်၍ သုစရိုက်ဆယ်ပါးကိုလည်းကောင်း အမြဲ ထိန်းကာ ပကာသနကင်းသဖြင့် သန့်ရှင်းသော ဒါန, ဥပုသ် သီလ, ဘာဝနာတို့ကိုသာ ကြိုးစားသင့်ကြပါသည်။
နိဂုံး
ဤ စတုတ္ထအခန်း၌ မြန်မာပြည် သာသနာဝင် အစဉ်အဆက်ကို အကျဉ်းမျှပြ၍ ကဿပဗုဒ္ဓရှင်တော်မြတ်၏ သာသနာတော်နောက်ပိုင်း အဖြစ်အပျက်ကိုလည်းကောင်း, ဤ အချိန်မှာပင် ပြိတ္တာ တစ္ဆေ ဖြစ်နေသူအချို့ကိုလည်းကောင်း ပြခဲ့ပြီ၊ ““ပိန္နဲသီး တစ်ပိုင်း ပုပ်နေလျှင် အကောင်းပိုင်းသည် အပုပ်ကို အကောင်း ပြန်ဖြစ်လာအောင် မစွမ်းဆောင်နိုင်ဘဲ သူသာလျှင် အပုပ်ဘက်သို့ ပါရတော့သကဲ့သို့ သာသနာဝင်အရှင်ကောင်းများလည်း မကောင်းသူတွေကို အကောင်းဖြစ်လာအောင် မတတ်နိုင်ဘဲ အကောင်းတွေသာလျှင် မကောင်းဘက်သို့ ပါရတော့မည်ကဲ့သို့ ဖြစ်နေချေပြီ””ဟု ဆရာတော်တစ်ပါး မိန့်တော်မူရှာပေသည်၊ ဤ စာရေးသူ၏ ကလေးဘ၀မှ ယခုအရွယ်ကျအောင် ဗုဒ္ဓရှင်တော်၏ သာသနာ ဆုတ်ယုတ်လာပုံမှာ မျက်မြင်အားဖြင့် ထင်ရှားလှပါသည်၊ ယခုနှယ်က တားဆီးမှု မရှိပါမူ အတော်ကြာလျှင် ကဿပရှင်တော်မြတ်၏ နောက်ပိုင်းသာသနာ အခြေတိုင်အောင် ပျက်စီးသွားမည်ကို စိုးရိမ်ရပါသည်၊ ယခုအခါ နေ, လ အသွင် ထင်ရှားတော်မူကြပေ သော သာသနာ့ဝန်ဆောင် ဆရာတော်အများလည်း (၆၀)အရွယ် တော် နည်းပါး၍ (၇၀)အတွင်း (၇၀) ကျော်အရွယ်တွေသာ များကြ လေသည်၊ ထိုဆရာတော်များသည် ယခုပင် သာသနာ့ဝန်ကို အားသွန်၍ မဆောင်နိုင်ကြတော့ပါ၊ နောက် (၁၀)နှစ်လောက် ကြာလျှင် ဖူးမြင်ခွင့် ရကောင်းမှ ရတော့မည်။
ထိုဆရာတော်ဘုရားများ ကွယ်လွန်၍သွားလျှင် မည်သည့်ဂိုဏ်း မည်သည့်တိုက်တာ၌မျှ (ယခု အခြေအနေအရ) အစားသွင်းစရာ မရှိကြပါ၊ ယခုအချိန်၌ပင် အစားသွင်းစရာ မရှိသဖြင့် ဟာ၍ ကျန်ရစ်သော တိုက်တာများကို မြင်နေကြရပြီ မဟုတ်ပါလော၊ ထို့ကြောင့် အနာဂတ်ကာလ၌ မြန်မာပြည် သာသနာတော်၏ တည်တံ့ရေးကိုလည်းကောင်း, စွမ်းနိုင်ကြပါမူ သာသနာတော်ကို အကြောင်းပြု၍ မြန်မာကို ကမ္ဘာက အသိအမှတ်ပြုရေးကို လည်း ကောင်း တွေး၍ အနာဂတ်သာသနာအရေးကို ညွှန်ပြဖို့ရာ လက်ရှိ သာသနာ့အခြေအနေပြ စတုတ္ထ ဤအခန်းကို ဆုံးခန်းသို့ ရောက်စေ ရပါသတည်း။
ပစ္စက္ခသာသနာရေးပြီး၏။
No comments:
Post a Comment