နိဂြောဓသာမဏေ၏ ဇာစ်မြစ်
အသောကမဟာရာဇာသည် ခမည်းတော် ဗိန္ဒုသာရမင်း နတ်ရွာစံလျှင် စံချင်း မိကွဲဖတူ ညီနောင် ကိုးကျိပ် ကိုးယောက်တို့ကို ရှင်းလင်းလေရာ အကြီးဆုံး သုမနမင်းသား၏ ကြင်ယာတော်သည် ကိုယ်ဝန်အရင့်အမာဖြင့် ထွက်ပြေးကာ စဏ္ဍာလတို့၏ ရွာဝယ် စဏ္ဍာလ အကြီးအကဲ၏ သမီးအမှတ်ဖြင့် အစောင့်အရှောက်ကို ခံယူနေစဉ် … နိဂြောဓသာမဏေ အလောင်းတော်ကလေးကို ဖွားမြင်ရလေသည်၊ ထို့နောက် ကလေး၏ အစွမ်းအစကို (ရဟန္တာ ဖြစ်သည့်တိုင်အောင်) မြင်တော်မူသော မဟာဝရုဏရဟန္တာအရှင်မြတ်က စောင့်ရှောက်၍ ခုနစ်နှစ်အရွယ်၌ ရှင်သာမဏေ ပြုပေး လေသည်၊ ထိုသို့ သာမဏေ ဖြစ်ပြီး၍ အတော်ကြာသောအခါ မယ်တော်ရှိရာသို့ သွားမည်ဟု ကြံကာ နန်းတော်မြေလမ်းဖြင့် ကြွသွားစဉ် အသောက မဟာရာဇာ မြင်ရလေသည်၊ ထို့ကြောင့် ““နိဂြောဓသာမဏေ””ဟူသည် အသောကမဟာရာဇာ၏ တူတော် အရင်း မင်းမျိုးမင်းနွယ်ဖြစ်သည်ဟု မှတ်ပါ။
မှတ်ချက်။ ။ အသောကမဟာရာဇာသည် ဗြာဟ္မဏရသေ့တို့ကို ထမင်းကျွေးရာ၌ သူတို့၏ စားသောက်ပုံ ဣနြေ္ဒ မရခြင်းကို မြင်ရသဖြင့် ကျွေးချင်စိတ် ကုန်ခန်းလောက်အောင် သဒ္ဓါ တရား ပျက်ခဲ့၏၊ နိဂြောဓသာမဏေ၏ ငြိမ်သက်စွာဖြင့် ဣနြေ္ဒ စောင့်စည်း၍ သွားနေပုံကို မြင်ရသဖြင့် ကြည်ညိုစိတ် ဖြစ်၏၊ သာမဏေ၏ တရားတော်သည် ဒါန၏ အကျိုးကို ပြုသော (အလှူခံ ပုဂ္ဂိုလ်က ကိုယ့်ဘက်ယက်သံပါသော) တရားမျိုး မဟုတ်ဘဲ မဟာရာဇာ၏ ကိုယ်ကျင့်ကို ပြသော အပ္ပမာဒတရားတော် ဖြစ်၏၊
ဤ သုံးချက်ကို ကောက်ချက်ချသောအခါ စဉ်းစားဉာဏ် ရှိသူတိုင်း ဗုဒ္ဓသာသနာကို မကြည်ညိုဘဲ မနေနိုင်အောင် ဖြစ်လောက်ပါပေသည်၊ ထို့ကြောင့် ယခုခေတ်၌ အနာဂတ်သာသနာကို ပြုပြင်လိုသော အရှင်တို့သည် အနေအထိုင် အပြောအဆို အသွားအလာ စားသောက်ပုံမှ စ၍ လူကြီးလူကောင်း ဆိုသူတွေထက် ဣနြေ္ဒရရ သိက္ခာရှိရှိ ဖြစ်နေအောင် မိမိတို့ကိုယ်တိုင် ပြုပြင်ဖို့ အရေးမကြီးပါလော၊ ဟာခန်းပြောခန်းမှာလည်း(သူလှူချင် လှူ, မလှူချင် နေ ငတ်၍ကား မသေနိုင်၊) ဒါနခန်းထက်ပင် ကိုယ်ကျင့်တရားကိုသာ မူရင်းထား၍ ဟောထိုက်သည် မဟုတ်ပါလော၊ ထိုသို့ တစ်မျိုးတစ်ဖုံ ပြောင်းလဲလိုက်ပါလျှင် မကြာခင် အသောကမဟာရာဇာလို စဉ်းစား တတ်သော တက်လူတွေက သာသနာတော်ကို အထင်ကြီးလာရပါ လိမ့်မည်။ ယခုသော် ထိုကဲ့သို့ အထင်ကြီးလောက်သော အကြောင်းများ၏ ချို့ငဲ့မှုကြောင့် (အလှူဒါနပြုချင်လာအောင် ဟောပြောမှု များသော ကြောင့်) သာသနာတော်ကို အတွင်းကျကျ ကိုးကွယ်ကြသော ဘုရား ဒကာ ကျောင်းဒကာ စသူတို့၏ သားစဉ်မြေးဆက် တက်လူကလေး တွေကပင် အထင်သေးနေကြပြီ မဟုတ်ပါလော၊ ဗုဒ္ဓရှင်တော်၏ သာသနာ့ဝန်ဆောင်ဘက်က စိတ်အထက်တန်းကျသော အမျိုးသား ကောင်း ရဟန်းတော်အပေါင်းတို့ စုပေါင်းညီညာလျက် ကိုယ်ကျင့် ဘက်က တိုးတက်အောင် ကြိုးစားဖို့ အချိန်ရောက်နေပါပြီ။
အသောကမင်းသာသနာပြုခန်း
အိမ်ရှေ့မင်း ရဟန်းပြုပုံ
အသောကမဟာရာဇာ၏ ညီတော်ရင်း ဖြစ်၍ အိမ်ရှေ့မင်းလည်း ဖြစ်သော တိဿမင်းသား တောကစားထွက်စဉ် သမင်များ၏ မြူးထူး ပျော်ပါးကြပုံကို မြင်၍ “အင်း… မြက်စားနေကြရသော သမင် များပင် ယခုလို ပျော်ပျော်ပါးပါး မြူးနေကြသေးလျှင် ဘုရင့် အလှူစာကို စားနေကြသော ရဟန်းတော်တွေကား အဘယ်မှာ မမြူးဘဲ နေနိုင်ကြမည်းနည်း”ဟု အတွေးပေါ်ကာ သူ၏နောင်တော် မဟာရာဇာကို ပြောမိလေသည်၊ မဟာရာဇာလည်း ထိုစကားကို ကြားရလျှင် အကျိုး အပြစ်ကို မစိစစ် မပြောပြသေးဘဲ “တစ်နေ့ကျမှ သူ့ကို နားလည်အောင် ပြရတော့မည်”ဟု ကြံစည်ကာ အတော်ကြာသော် အကြောင်းတစ်ခုကို ရှာ၍ စိတ်ဆိုးဟန်ဆောင်ပြီး… “မင်းသား… တိုင်းပြည်ကို လက်ခံ၍ ခုနစ်ရက်မျှ စံစားပေတော့၊ ခုနစ်ရက် လွန်သောအခါ သင့်ကို သတ်မည်”ဟု အမိန့်ပေးကာ တိုင်းပြည်ကို လွှဲအပ်လေသည်၊ မင်းသားကား တိုင်းပြည်ကို ရသော်လည်း (သေရမည့် အရေးကို တွေးကာ) စံစားချင်စိတ် မပေါ်လာဘဲ မအိပ်နိုင် မစားနိုင် ဖြစ်နေတော့၏။
ထိုအနေကို မြင်ရသော မဟာရာဇာသည် ညီတော်ကို ခေါ်ပြီး လျှင် ““ဟဲ့ တိဿ…ခုနစ်ရက်ကြာလျှင် ငါသေရတော့မည်ဟု ထင်နေရုံမျှဖြင့် သင့်ကိုယ်တိုင် မပျော်နိုင်ပုံကို စဉ်းစားလော့၊ ရဟန်း တော်များကား ရှူရင်း ရှိုက်ရင်း သေရခြင်းနှင့် ဆက်သွယ်နေပုံကို အမြဲဆင်ခြင်နေကြရကား အဘယ်မှာ ပျော်ပါးနိုင်တော့မှာလဲ””ဟု ပြောပြသောအခါ သာသနာတော်ကို ကြည်ညိုလာသဖြင့် နောက် တစ်ခါ တောလည်အသွားတွင် ရဟန္တာတစ်ပါး၏ တန်ခိုးကို မြင်ရ ပြန်သောကြောင့် ချက်ချင်း ရဟန်းပြုချင်စိတ် ပေါ်ကာ သူဖူးမြင်ခဲ့ ရသော အရှင်မဟာဓမ္မရက္ခိတရဟန္တာအရှင်မြတ်အထံ၌ ရဟန်းပြု လေသည်၊ ထိုအခါ အိမ်ရှေ့မင်းကို အားကျ၍ မဟာရာဇာ၏ နှမသားလည်း ဖြစ်, သမီးတော်သံဃမိတ္တာ၏ ကြင်ဖက်လည်းဖြစ် သော အဂ္ဂိဗြဟ္မမင်းသားနှင့်တကွ အများပင် ရဟန်းပြုကြလေသည်။
ရှစ်သောင်းလေးထောင် ကျောင်း, စေတီ
ထိုအသောကမဟာရာဇာသည် …“ဓမ္မက္ခန္ဓာ ရှစ်သောင်းလေးထောင် ရှိ၏” ဟု ကြားသိရ၍ ဓမ္မက္ခန္ဓာ တစ်ပါးလျှင် ကျောင်းတိုက်တစ်တိုက်စီ ပူဇော်လိုသောဆန္ဒဖြင့် (၉၆) ကုဋေသော ဥစ္စာကို စွန့်လွှတ်၍ တစ်မြို့လျှင် (ရွာကြီးများလည်း ပါပေလိမ့်မည်၊) တစ်ကျောင်းတိုက်စီ တည်ဆောက်ဖို့ အမတ်တို့ကို စေခိုင်းလေသည်၊ ထိုအမတ်များလည်း အသောကမဟာရာဇာ၏ ပိုင်ရာဒေသတိုင်း၌ ကျောင်းတိုက်များ တည်ကြလေရာ ကျောင်းနှင့် တကွ စေတီတော်ပါ အပြီးအစီး တည်ထားကြလေသည်၊ ထို့ကြောင့် မဟာရာဇာ၏ကုသိုလ်တော်များကို “ကျောင်းတိုက်နှင့်စေတီတော် ပေါင်း ရှစ်သောင်းလေးထောင်စီ ရှိ၏”ဟု ပြောစမှတ် ပြုကြသည်။
No comments:
Post a Comment