ဆင်းရဲခြင်းလောကဓံအောက်က ပျက်စီးသွားသော ကိုယ်ကျင့်တရားများ(ဖြစ်ရပ်မှန်) အရှင်ပဏ္ဍိတ(ဒေါင်းဖြူ) မှ စက်တင်ဘာ 18, 2013 3:30pm တွင် တင်သွင်းခဲ့ခြင်းဖြစ်ပါသည်

http://buddhismworld.ning.com/profiles/blogs/6371237:BlogPost:372552

ပြီးခဲ့တဲ့နှစ်(၂)လလောက်က ဗုဒ္ဓကမ္ဘာဆိုဒ်က အမေ့ဂုဏ်ရည်ဆရာတော်လေး ဖုန်းဆုံးရှုံးသွားကြောင်းသိလိုက်ရတယ်..။ သူကတော့ ဦးဇင်းနဲ့အဆောင်တူပါတယ်..။ သူက နိုင်ငံတော်ပရိယတ္တိသာသနာ့တက္ကသိုလ်(ရန်ကုန်)မှာ B.A(BUDDHISM-FINAL)တန်းကို တက်ရောက်နေတာဖြစ်ပါတယ်….။ န.ပ.သ-တက္ကသိုလ်များရဲ့ စည်းမျဉ်းတွေထဲမှာ ဖိုင်လ်နယ်ကျောင်းသားတွေဟာ စာမျက်နှာ(၅၀)မှ (၁၀၀)အတွင်း Term-Paper-စာတမ်းတစ်စောင် မဖြစ်မနေ တင်သွင်းကြရပါတယ်..။ သက်မှတ်ကာလအတွင်း မတင်သွင်းနိုင်ရင် အတန်းတင်စာမေးပွဲကို အလိုအလျောက် ကျရှုံးရပါတယ်…။

အမေ့ဂုဏ်ရည်ဆရာတော်လေးမဲကျတဲ့ စာတမ်းခေါင်းစဉ်က “ကျောင်း,ကန်,ဘုရား ၊ တည်ထားစေတီ”တဲ့..။ အဲဒီအတွက် ကျောင်းပိတ်ချိန်မှာ မြန်မာနိုင်ငံအထက်ပိုင်း စကိုင်းတိုင်းဘက်မှာရှိတဲ့ ကျောင်းတွေရဲ့သမိုင်း၊ အလှူရှင်တွေရဲ့ရည်ရွယ်ချက်၊ ဆောက်လုပ်ရခြင်းအကြောင်းအရင်းတွေကို သွားရောက်လေ့လာခဲ့ပါတယ်။ တွေ့ရှိခဲ့သမျှကိုလည်း ဖုန်းနဲ့ဓာတ်ပုံရိုက်ပြီး မှတ်တမ်းတင်ခဲ့ပါတယ်။ အဲဒီဓာတ်ပုံတွေဟာ စာတမ်းအတွက် အထောက်အကူတွေပေါ့..။

ကျောင်းပြန်ဖွင့်တဲ့အခါကျတော့ ရန်ကုန်မြို့မှာရှိတဲ့ စေတီ,ရေကန်တွေ,သမိုင်းကျောက်စာတွေကို သွားရောက်လေ့လာပြီး ဖုန်းလေးနဲ့ပဲ မှတ်တမ်းတင်ဓာတ်ပုံတွေ ရိုက်ကူးခဲ့ပါတယ်။ အဲ.. လေ့လာရိုက်ကူးစရာတွေကုန်တဲ့အခါ တက္ကသိုလ်ကို ပြန်လာဖို့တက္ကစီငှါးစီးပါတယ်။ ပြီးတော့ သူက (၈)မိုင်မှတ်တိုင်မှာဆင်းဖို့လုပ်တော့ ကားတံခါဖွင့်ကို အခက်အခဲဖြစ်တာနဲ့ ထိုင်ခုံရှေ့က ဘုတ်ပေါ်မှာ ဖုန်းခဏတင်ပြီး ခဏဆင်းလိုက်ပါတယ်။

အဲဒီအချိန်မှာပဲ တက္ကစီက မောင်းထွက်သွားပါတော့တယ်။ ချက်ခြင်းသတိရတာနဲ့ ဖုန်းထပ်ဆက်ကြည့်တယ်။ ဖုန်းတော့ ကိုင်ပါရဲ့…။ ဒါပေမယ့် “ကားက ဗဟိုဈေးရောက်နေပြီဘုရား…”တဲ့။ တယ်မြန်တဲ့ တက္ကစီသမားပေပဲ။ ဒါနဲ့ “ဒကာကြီးရေ… အဲဒီဖုန်းထဲမှာ ဦးဇင်းရဲ့ ဘွဲ့ယူစာတမ်းအတွက် မှတ်တမ်းမှတ်ရာတွေ ပါပါတယ်။ ဒကာကြီးကို ၀တ္ထုငွေ(၁)သိန်း ဆုချပါမယ်။ ဖုန်းလေးတော့ မဖြစ်မနေ ပြန်ပေးစေချင်တယ်”ဆိုတော့ ဘာမှ ပြန်ပြောသံမကြားရတော့ဘဲ ဖုန်းချသွားခဲ့တယ်။

အဒီတော့ စဉ်းစားစရာလိုနေပြီ။ တို့လူမျိုးတွေထဲမှာ ဒီလိုကိုယ်ကျင့်တရားကို တန်ဘိုးမထားတဲ့သူတွေ ဘယ်လောက်များနေပြီလဲပေါ့…။ ငွေကြေးအတွက် ငရဲကိုလည်း အသိအမှတ်မပြုကြတော့ဘူးထင်ပါရဲ့။ တကယ်ဆို အဲဒီ တက္ကစီသမားက ဗုဒ္ဓဘာသာပါ။ ဦးဇင်းတို့တတွေ တက္ကစီငှါးရင်တောင် ဗုဒ္ဓဘာသာဝင်တွေမောင်းတဲ့ တက္ကစီတွေကိုပဲ ရွေးပြီးစီးကြတာပါ..။ အခုတော့…. လုပ်ရက်လေခြင်း..နော်..။
==============================================
ကဲ….. အခုသိပ်မကြာပါဘူး..။ အရှင်ခေမာစာရ(ပုသိမ်)ခါးပိုက်နှိုက်ခံရပြန်ပြီ။ ပိုက်ဆံအိပ်နဲ့ ၀တ္ထုငွေတွေအပြင် ကျောင်းသားကဒ်နဲ့ မှတ်ပုံတင်တွေပါ ပါသွားတယ်။ ဒါပေမယ့် နောင်တော်ကြီးဦးခေမာစာရက ခါးပိုက်နှိုက်သမားကို မှတ်မိလိုက်တဲ့အတွက် သက်ဆိုင်ရာကလူတွေနဲ့လိုက်တော့ ခါးပိုက်နှိုက်သမားအိမ်ကို တန်းတန်းမက်မက်ရောက်သွားပါတယ်။ သူတို့ရောက်သွားတဲ့အချိန်မှာ ခါးပိုက်နှိုက်သမားက အိမ်မှာမရှိပါဘူး..။

နောင်တော်ကြီးပိုက်ဆံအိပ်ထဲကငွေတွေကို သွားဖြုန်းနေလေရဲ့…။
ခါးပိုက်နှိုက်သမားရဲ့အိမ်ကိုကြည့်လိုက်တော့ တော်တော့ကို စုတ်ချာလွန်းလှပါတယ်။ မိသားစုဝင်တွေကလည်း နွမ်းနွမ်းပါးပါးပါပဲ။ ခါးပိုက်နှိုက်သွားတဲ့ကောင်လေးကလည်း အသက်(၁၆)နှစ်လောက်ပဲ ရှိပါသေးတယ်။ နောက်ဆုံး စာရင်းချုပ်လိုက်တော့ ဖုန်းတော့ ပြန်ရလိုက်တယ်။ ပိုက်ဆံတွေကတော့ မရတော့ဘူး..။ သုံးလို့ကုန်သွားပြီ ပြောတာပဲ။
ကျောင်းသားကဒ်နဲ့မှတ်ပုံတင်ကိုလည်း ရေမြောင်းထဲ ပစ်ချလိုက်တယ်..တဲ့။ ၀တ္ထုငွေ(၂)သိန်းကလည်း သုံးလို့ကုန်သွားပြီဆိုတဲ့ စကားသံအောက်မှာပဲ အစအနပျောက်ခဲ့လေရဲ့….။
ကဲ.. နောင်တော်ကြီးဦးခေမာ ဘာလုပ်မယ်ထင်လဲ…? အံ့သြစရာကောင်းလှတဲ့ အပြုအမှုကို လုပ်ခဲ့ပါတယ်။ ခါးပိုက်နှိုက်တဲ့ကောင်လေးကို အမှုကြေအေးပေးခဲ့ပါတယ်။ သက်ဆိုင်ရာကိုလည်း အရေးမယူကြဖို့ မေတ္တာရပ်ခံပေးခဲ့ပါတယ်။ တကယ်ကို လေးစားထိုက်တဲ့ ခွင့်လွှတ်မှုမျိုးပါ။ ကိုယ့်အပေါ်မကောင်းတဲ့သူကို အကောင်းဆုံး မေတ္တာတရားတွေ ပြန်လည်မျှဝေပေးခဲ့တာ တွေ့မြင်လိုက်ရပါတယ်…။
ဒါမျိုးလေးတွေ တွေ့လိုက်ရတော့ စိတ်ထဲမှာ မချင့်မရဲလေးဖြစ်မိတယ်။ တို့နိုင်ငံမှာ ဆင်းရဲမွဲတွေမှုဟာ ကိုယ်ကျင့်တရားတွေကို သတ်ပစ်လိုက်ပြီလားလို့ပေါ့။ “ခါးပိုက်နှိုက် သတိပြုပါ”ဆိုတဲ့ စာတမ်းလေးတွေကို မြင်ယောင်မိတဲ့အခါတိုင်း ငါးပါးသီလတွေဟာ ထမင်းပုဂံအောက်မှာ ပျောက်ကွယ်သွားခဲ့ပြီဆိုတာ နားလည်လိုက်မိပါတယ်။..။
မနေ့တုန်းက ဒကာတစ်ယောက် ဦးဇင်းတို့အဆောင်ကို ရောက်လာတယ်….။ ထောင်ကထွက်လာတာ ပြန်စရာလမ်းစရိတ်မရှိလို့ပါ-ဆိုတာနဲ့ အဆောင်က ကိုယ်တော်တွေ တစ်ပါးတစ်ထောင်စုပြီး ကူညီလိုက်တာ တွေ့လိုက်ရတယ်။ ဦးဇင်းဆီလည်း ရောက်လာတာနဲ့ ဘေးနားမှာရှိတဲ့ ၀တ္ထုငွေ(၁၂၀၀)ပေးလိုက်ပါတယ်။
အရင်တုန်းကလည်း လာလိမ်တဲ့သူတွေ တွေ့ဖူးပါတယ်။ ဒါပေမယ့် ကူညီပေးလိုက်ကြပါတယ်။ တစ်ချို့ကမေးတယ်…”အဲဒီလူက လူလိမ်လေ… အရှင်ဘုရား မသိဘူးလား”တဲ့..။ ဦးဇင်းပြန်ပြောလိုက်မိတာက “လူလိမ်တွေကို ရှောင်လိုက်မယ်ဆိုရင် အဲဒီထဲမှာ တကယ်ဒုက္ခရောက်တဲ့သူတွေ ပါသွားမှာစိုးလို့ပါဘုရား”လို့…။
အားလုံး ရွှင်လန်းချမ်းမြေ့ကြပါစေ..။
အရှင်ပဏ္ဍိတ(ဒေါင်းဖြူ)

Copy from other posts